Pagina Inicial»Noticia
Líder Bancada Parlamentar sira iha Quinta-feira horissehik decide sei realiza sessão plenária iha segunda-feira loron 26/10/2020, hodi halo votos confirmação kona-ba Lei Proteção Civil ne’ebé foin lalais hetan veta hussi Presidente Republica, Francisco Guterres Lu-Olo.
Nune’e mós iha terça-feira loron 27/10/2020 Parlamento Nacional sei halo plenária hodi discute kona-ba pedido autorização ba extensão Estado de Emergência ba dahituk.
Hanessan ita hotu hatene katak iha segunda-feira loron 22/10/2020, Parlamento Nacional convoca reunião Plenária ordinária tuir agenda N.o 215/V (3ª) ne’ebé Deputado sira apresenta preocupação sira hanessan;
Falta equipamento saúde nian iha Hospital Nacional Guido Valadares hodi atende moras urgência sira, la iha moru proteção ba centro de saúde sira iha município no hussu atu Ministério da Saúde reativa fila fali programa saúde na família.
Preocupa kona-ba estatuto professor sira contratado nian, professor balun seidauk simu retroativo, bolseiro sira ne’ebé remata ona sira-nia estudo maibé Governo abandona hela, no hussu atu lori fila estudante sira iha nação Filipina no Israel mai Timor-Leste.
Deputado sira levanta kona-ba subsidio Covid-19 ba jornalista sira ne’ebé seidauk distribui, subsidio ba reclamante Uma-Kain sira ne’ebé seidauk hetan pagamento.
Alem de ne’e, preocupa mós kona-ba falta vê-mos iha capital Díli inclui município sira, sucos balun iha município seidauk acesso eletricidade, estada no seluk tan.
Entretanto ba projeto de resolução nº. 59/V (3ª)- Recomenda ao Governo a adoção de medidas de proteção a crianças e jovens, adia fali ba semana oin.
Sessão Plenária Terça-feira, loron 20/10/2020, liu hussi agenda N.o 216 /V (3ª), Governo halo apresentação ba Plano Recuperação Económica, ne’ebé foca ba agricultura, turismo, educação, saúde, proteção social no reforma institucional ne’ebe Governo sei implementa iha tempo badak.
Iha Quarta-feira, Presidente Parlamento Nacional, halo abertura ba Feira do Livro, iha fundação oriente ne’ebe organiza hussi Embaixada Portugal no Brasil iha Timor-Leste.
Programa Fiscalização;
Parte seluk, Comissão Especializada Permanente sira hanessan Comissão E ne’ebé trata Infraestruturas iha loron 14 too 17 fulan outubro tinan 2020, hala’o fiscalização iha Município Ainaro.
Fiscalização ne’ebé lidera hussi Presidente Comissão E, Deputado Abel Pires da Silva, ne’e hahú reunião ho Administrador Município Ainaro, Albertino de Araujo, ho nia diretor sira hodi discute kona-ba projeto hirak ne’ebé implementa iha Município Ainaro.
Hafoin continua ba fiscaliza estrada no ponte foun ne’ebé implementa hussi Empresa Jonize, ne’ebé ligação entre Suco Cassa ho Suco Ainaro, no fiscaliza subestação EDTL Cassa.
Fim hussi fiscalização Comissão E ne’e mak haree diretamente edifício sira hanessan edifício obras publicas, ADN, SAS no EDTL atu haree condição real no ambiente serviço nian.
Entretanto Comissão F ne’ebe trata assunto Saúde, Segurança Social e Igualdade Género, ne’ebe lidera hussi Presidente Comissão F, Deputado Noé da Silva Ximenes “Buka Tuir” acompanha hussi membro sira, halo fiscalização iha Município Aileu iha loron 14 to’o 16 fulan outubro tinan 2020.
Iha fiscalização refere, além de reunião ho administrador município, Deputado sira halo fiscalização ba centro saúde sira hanessan iha Seloi-Kraik, Remexio, Liquidoe, no centro saúde Aileu Vila, hodi haree diretamente condição real no ambiente serviço ba pessoal saúde sira-nian.
