Pagina Inicial»Noticia
Parlamento Nacional liu hussi sessão plenária ordinária iha loron 13 fulan outubro tinan 2020, Deputado sira halo votação ba edição nº 48, I série-A, Jornal Parlamento Nacional nian ho votos 37 a favor, 2 contra no 10 abstenções.
iha período da Ordem de Antes da Ordem do Dia, Bancada Parlamentar FRETILIN halo declaração politica kona-ba comemoração Loron Nacional de Cultura, ne’ebé sei celebra iha loron 14 outubro 2020, no hussu atu Parlamento Nacional reabertura Lei Direito de Autor hodi valoriza ita nia artista sira.
Iha intervenção diversas, Deputado sira questiona kona-ba utilização fundo de reserva; relatório de empenhamento no mos relatório trimestral hussi Governo mai Parlamento; além de ida ne’e, ko’alia mos kona-ba condição tratores iha costa sul, ne’ebé mak la funciona; kona-ba Problema eletricidade, bee moos, saúde, educação no estradas; kona-ba estudante timor oan iha Filipina hussu atu Governo Timor-Leste, iha coordenação ho Governo Filipina, atu bele facilita sira nia regresso ho avião ne’ebé mak atu mai tula fila cidadão filipina balun iha Timor hakarak fila ba Filipina iha fulan ida ne’e nia laran.
Relaciona ona questão sira ne’e, Ministro dos Assuntos Parlamentares e Comunicação, Francisco Jerónimo, hatete, em relação ho preocupação sira ne’ebe levanta hussi Deputado sira iha semana hirak liu ba, ninia resposta por escrita haruka ona mai Parlamento Nacional. Em relação ho preocupação ohin loron nian, Governo toma nota no sei reencaminha ba ministério competente sira hodi tau iha consideração.
Iha período da Ordem do Dia, liu hussi discussão ne’ebé mak naruk ba Projeto de Resolução nº 42/V (2ª) – recomenda ao Governo a adoção de medidas para prevenir e combater a violência contra mulheres e meninas e o assédio sexual nos transportes públicos, ikus mai Deputada proponente sira retira resolução refere no halo melhoramento ba texto baseia ba ideias no sugestões hussi Deputado sira iha reunião plenária ida ne’e.
Sessão Plenária ne’e preside hussi Vice-Presidente Parlamento Nacional, Maria Angelina Lopes Sarmento, acompanha hussi membro Mesa sira no marca presença hussi Ministro de Assuntos Parlamentares e Comunicação, Francisco Jerónimo.
