Pagina Inicial»Noticia
Parlamento Nacional, liu hussi reunião plenária ordinária iha loron 20 fulan julho tinan 2020, iha período Ordem do Dia nian, ho presença Deputado 61 halo discussão no aprovação ho unanimidade ba Projeto de Lei nº 1/V(1ª), - Medidas de Prevenção e Combate à Corrupção, ho votos 61 a favor, 0 contra no 0 abstenções.
Objetivo hussi Lei Anti-Corrupção mak dispõe medidas gerais ba prevenção, regime declaração ba rendimento, bens e interesses, nomos define crime sira corrupção nian, pena sira ne’ebé sei aplica no meios especiais ba obtenção no conservação ba prova. Lei ida ne’e mós procede ba alteração daualuk código penal nomos alteração dahuluk ba lei Comissão Anti-Corrupção nian.
Iha intervenção Bancadas Parlamentares nian, maioria apoio iniciativa legislativa ida ne’e hodi assegura boa governação no bele combate corrupção iha Nação Timor-Leste, tanba ne’e precisa divulgação, atu nune’e ema hotu bele intende no participa iha medidas de prevenção nian.
Iha Período de Antes da Ordem do Dia, Plenário halo aprovação ba voto de pesar ba saudosa Adélia Soares Martins Sarmento “Cristal”, ne’ebé hakotu iis iha loron 30 fulan junho tinan 2020 ho idade 49 anos, voto de pesar ne’e aprova ho unanimidade a favor 58, contra 0 no abstenções 0.
Além de ne’e, Bancada Parlamentar CNRT halo declaração politica hodi clarifica declaração Bancada nian iha semana kotuk, 14 de julho de 2020, relaciona ho Participação membro F-FDTL no PNTL balun iha atividade partidária. Nune’e mós Bancada KHUNTO, halo declaração politica relaciona ho visão no missão partido ninian relaciona ho situação politica iha rai laran. Antes hato’o declaração ne’e, Deputado Luís Roberto hussu desculpa ba ema hotu relaciona ho intervenção Deputado nian iha semana liu ba.
Iha intervenção diversas, Deputado sira ko’alia kona-ba, subsídio terceira idade to’o agora ferik katuas sira seidauk simu; Igreja Metinaro Precisa atenção urgente tanba bainhira mossu udan boot ou inundação bele estraga Igreja refere; Abono família ba Funcionário público sira, precisa instituição relevante tau atenção, tanba iha implementação, funcionário balun iha oan barak no balun oan la iha maibé ninia implementação hanessan de’it ba funcionário sira hotu.
Além de ne’e, Deputado sira continua hato’o preocupação kona-ba problema sira mak hanessan, bee moos, eletricidade, estrada, irrigação, área educação no mos área saúde ninian.
Sessão Plenária ne’e preside hussi Presidente Parlamento Nacional, Aniceto Longuinho Guterres, acompanha hussi membro Mesa sira, no hetan presença hussi Ministro dos Assuntos Parlamentares e Comunicação, Francisco Gerónimo, no mos Entidades importante sira mak hanessan, Comissário Comissão Anti-Corrupção, Ministério da Justiça, Provedora da Provedoria dos Direitos Humanos e Justiça, Diretor Policia Cientifica de Investigação Criminal, Adjunta Defensória Pública no Programa de Monitorização do Sistema Judicial (JSMP).
