Presidente Parlamento Nacional, Aniceto Longuinhos Guterres Lopes halo reunião ho Provedoria dos Direitos Humanos e Justiça (PDHJ), Sra. Jesuina Maria Ferreira Gomes ho nia equipa, iha loron 17 fulan junho tinan 2020, iha Gabinete Presidente Parlamento Nacional nian.
Objetivo hussi reunião ne’e, Provedoria dos Direitos Humanos e Justiça ho nia estrutura lori relatório anual tinan 2019 nian mai entrega ba Presidente Parlamento Nacional, hodi nune bele agenda ba discussão iha Plenária.
Depois de encontro, Provedora ne’e haktuir ba jornalista sira katak, PDHJ durante ne’e regista caso hamutuk 230 queixas, iha 99 queixas kona-ba Violação Diretos Humanos, 131 queixas kona-ba violação boa-governação. Provedora mos explica liu tan katak, hussi 230 keixas ne’e, loke ba processo investigação hamutuk 102 casos, 56 liga ba Violação Diretos Humanus, 46 liga ba violação Boa-Governação.
Além de ne’e, Provedora mos hatete, PDHJ prepara hela parecer ida kona-ba esboço Lei Difamação nian, hodi hare ba principio Diretos Humanos no liga ba liberdade no garantia fundamental cidadão nian hodi recomenda ba Parlamento Nacional, ba Governo no mos ba Sua Excelência Presidente da Republica.
