Parlamento Nacional, liu hussi Sessão Plenária ordinária, iha loron 25 fulan maio tinan 2020, Presidente Parlamento Nacional anuncio admissão no baixa lei proteção civil ba comissão A ne’ebé trata assunto Constitucionais e justiça no Comissão B ne’ebá trata assunto Negócios Estrangeiros, Defesa e Segurança.
Proposta de lei no 16/V(2ª)-Lei da Proteção Civil, ne’ebé baixa ona ba Comissão competente sira sei halo serviço durante loron 15 nia laran, hafoin apresenta hikas sira nia relatório no pareceres ba plenária hodi halo discussão no aprovação.
Iha intervenção diversas hussi Deputado sira, questiona situação inundação nebe mak acontece iha município sira hodi estraga população nia hela fatin, tos no natar, no mos halo estrada no ponte sira kotu hodi dificulta transporte sira nia movimento iha município sira, husu Governo fo apoio urgente ba vitima sira.
Iha parte seluk, Deputado sira mos koalia kona-ba situação estado de emergência liga ho pandemia covid-19, hare ba pais vizinho sei iha hela zona mean, ho nune husu atu bele hare no decide atu estende ou lae. Karik estende tenki fo flexibilidade ba comunidade hodi buka moris maibe husu taka nafatin fronteira sira.
Além de ne’e, questiona mos kona-ba, apoio ou subsidio sira ne’ebé mak Governo promete atu ajuda população no mos estudante sira iha nação seluk maibe to’o agora seidauk implementa.
Deputado sira agradece ba população no mos juventude sira hotu ne’ebé fo ona contribuição ho maturidade politica hodi mantein situação calma mesmo mosu ação politica iha Parlamento Nacional.
Hatan ba preocupação hussi Deputado sira, Secretário de Estado Comunicação Social, Mericio Juvenal, hatete, relaciona ho estado de emergência, Governo rona ona explicação hussi gestão de crise no sei deside iha reunião conselho ministro iha loron ohin; kona-ba apoio ou subsidio ba populasaun no mos estudante sira ministério relevante sira halibur ona dadus no iha tempo besik sei implementa; inundação ne’ebé mak estraga comunidade nia hela fatin, aihoris no mos estraga ponte sira, equipa hussi ministério obras publicas halo hela dadaun atendimento. Informação sira seluk sei encaminha ba ministério relevante hodi tau iha consideração.
Antes Secretário Estado atu remata nian intervenção, informa mos ba plenário katak, Conselho Ministro aprova ona atu prolonga tan estado de emergência.
Relaciona ho agenda ba destituição no eleição ba cargo Secretário e Vice-secretário da Mesa, Presidente anúncio ba plenário katak, Mesa simu ona requerimento sira no candidatura husi Deputado sira, no labele halo eleição iha loron ohin tanba tuir regimento Parlamento katak apresentação candidatura ba Presidente Parlamento Nacional to’o 24 horas molok data ne’ebé marca ba eleição, ho nune’e Presidente decide sei halo discussão iha loron aban 26 de maio de 2020.
Sessão plenária ne’e preside hussi Presidente Parlamento Nacional, Aniceto Longuinhos Guterres Lopes, acompanha hussi Vice-Secretária da Mesa, Deputada Regina Freitas, no mos ho presença Secretário de Estado para a Comunicação Social, Merício Juvenal dos Reis “Akara”.
