Pagina Inicial»Noticia
Parlamento Nacional, iha loron 27 fulan abril tinan 2020 iha sessão plenária ordinária, halo analisa, discuti no vota ba pedido de renovação Estado de Emergência ba país, pedido ne’e apresentado hussi Presidente da República antes primeiro Estado de Emergência nia loron hotu.
Primeiro-Ministro, Taur Matan Ruak, iha inicio debate, hatete renovação ba pedido tanba haree ba factos katak vírus ne’e continua iha hodi estraga país, ho nune, estado de calamidade pública sei mantem.
Iha intervenção Deputado sira nian, Bancada sira hatete Estado de Emergência ne’e iha nia vantagens no desvantagens, maibé preciso continua halo prevenção hodi combate vírus covid-19, enquanto seidauk iha controla no seidauk iha vacina atu cura iha ita nia nação. Para além de ida-ne’e, Deputado sira manifesta mos sira nia gratidão ba funcionário sira ne’ebé agora daudaun iha linha frente ba serviço combate ba pandemia, mak hanessan pessoal de saúde, polícia, pessoal de limpeza no jornalistas, ba prestação serviço ne’ebé mak di’ak tebes.
Iha parte seluk, Deputados balun hato’o sira nia preocupação relaciona ho população sira ne’ebé la hetan ajuda no la iha possibilidade ba financeira atu bele moris no agora sira enfrenta hamlaha tambá sira la serviço. Ho nune’e, hussu ba Governo atu acelera processo relativo ho suplementos remuneratórios ba polícia, nune mos apoio sira ba família sira ne’ebé kbiit laek, ne’ebé mak to’o agora seidauk implementa. Deputado sira mos hatudu sira nia preocupação ba questão violência doméstica, ne’ebé bele aumenta iha período ne’ebé mak família sira passa tempo barak liu iha uma, no hussu atu reforça apoio ba inan feton sira ne’ebé terus ba tipo de abuso ida ne’e. Deputado balun mos ko’alia katak, embora Governo iha ona pedido aumenta medicamento no equipamento sira médico atu combate vírus ne’e, médico sira no pessoal de saúde continua serviço ho falta de material prevenção. No ikus, hussu reforço ba medida sira prevenção sira, tanto iha nível da saúde no mos iha nível segurança pública.
Iha resposta Primeiro-Ministro nian ba Deputado sira, hatete, Governo reconhece questão sira levanta hussi Deputado sira ne’e compreensíveis no Governo sei esforço ho força hotu ne’ebé mak iha atu la hussik população iha situação ida ne’ebé ladún di’ak. Ikus mai, apela ba renovação ba Estado de Emergência, hodi hatete nação la livre hussi vírus ida ne’e, no iha tempo agora ne’e, vida ema nian importante liu, do que situação económica.
Pedido renovação Estado de Emergência ne’e aprova ho votos a favor 37, contra 23 no abstenções 4, ba nia duração ba loron 30.
Reunião ne’e presidi hussi Presidente Parlamento Nacional, Arão Noé de Jesus da Costa Amaral, acompanha hussi membro da Mesa sira, no conta ho presença Primeiro-Ministro, Taur Matan Ruak, no membro Governo sira.
