Parlamento Nacional, liu hussi Sessão Plenária ordinária iha loron 21 fulan abril tinan 2020, halo discussão no aprovação ba voto de pesar ba falecimento médico Daniel Murphy ho votos 55 a favor,0 contra no 0 abstenções. dr. Daniel Murphy hakotu nia iss iha loron 14 de abril de 2020 tanba sofre moras cardíaco. Matebian moris iha Alton, Cidade Lowa, iha Estado Unido América, iha loron 23 fulan setembro tinan 1944. Matebian hahu halao nia knar iha Timor-Leste iha tinan 1998 iha Clinica Motael, depois 1999 continua serviço iha Clinica Barru-Pite, hafoin 1999, matebian sai hanessan fundador ba iha clinica refere hodi fo tratamento saúde ba ema hotu.
Iha sessão plenária ne’e, Bancada Parlamentar Partido Democrático representa hussi Deputado António da Conceição halo declaração política relaciona condição situação moris povo kbiit laek iha Estado de Emergência.
Iha intervenção diversos Deputado sira nia questiona kona-ba, implementação hussi Estado de Emergência, liu-liu ba regras sira ba prevenção COVID-19, comunidade balun la cumpri distanciamento social; falta de socialização ba comunidade sira liu hussi media social hanessan Radio no TV sira; pessoal balun iha quarentena la halo tuir ordem; hussu Paciente ida ne’ebé recupera hussi COVID-19 atu partilha experiência liu hussi media sira.
Além de ne’e, koalia mos questão kona-ba impacto hussi COVID-19, halo comunidade tauk atu ba halo tratamento ba moras seluk iha clinica ou hospital sira; preço combustível iha Oecússi karun no comunidade laiha kbiit atu sossa; lixo Tibar continua halo sunu deit, lixo sira ne’e bele afeta ba comunidade nia saúde rassik; no mos informação importante sira seluk.
Sorin seluk, Deputado sira mós sugere atu subsidio ba pessoal sira ne’ebé considera hanessan linha frente tau direita ba iha conta bancaria pessoal nian. Nune’e mos, ho programa Ministério Educação atu fo exame ba estudante sira precisa tetu, tanba maioria estudante sira laiha facilidade hodi facilita sira acompanha programa “Estuda ba uma”.
Hatan ba preocupação sira ne’e, Secretário de Estado Comunicação Social, Merício Juvenal dos Reis “Akara”, hatete sei regista hotu informação técnica sira, atu nune’e governo bele tau atenção sério no halo acompanhamento. Maibe liga ho informação kona-ba socialização informação liu hussi meios comunicação social, Secretário de Estado hatete, antes Estado de Emergência, Ministério Saúde, Secretario Estado Comunicação Social hamutuk ho parceiro sira seluk, halo ona disseminação informação tama sai suco hodi explica kona-ba prevenção tuir saúde mundial haruka, no to agora sei continua hela. Kona-ba subsídio técnico ne’e aprovado ona, iha tempo badak sei implementa. Secretário de estado reforça katak continua assegura ligação transporte ba Atauro no Oecússi semana ida dala rua, no ligação internacional Governo halo ona Contrato ho companhia Airnorth tanba preço kiik, ho nia semo semana ida dala tolu hodi transporta sasan necessidade sira. Equipamento sira saúde nian ne’ebé atu sosa liu hussi PNUD hodi garantia qualidade. Além de informação sira ne’e, Secretário de Estado mos informa katak Governo prepara ona extensão ba Estado de Emergência ba loron 30 tan, no sei haruka ba Presidente da República.
Sessão Plenária ne’e, preside hussi Vice-Presidente Parlamento Nacional, Luís Roberto da Silva, acompanha hussi membro da Mesa sira, conta mos ho presença Secretário de Estado Comunicação Social, Merício Juvenal dos Reis “Akara”.
