Pagina Inicial»Noticia
Parlamento Nacional, liu hussi reunião Plenária ordinária iha loron 02 fulan março tinan 2020, Deputado sira halo apreciação ba Relatório de Fiscalização Comissão Economia e desenvolvimento (Comissão D) iha Atauro, Díli, nomos Hatulia, Ermera. Relatório ne’e apresenta hussi Vice-Presidente Comissão D, Deputado Ricardo Baptista no relatora Deputada Olinda Guterres.
Antes tama ba intervenção diversas hussi Deputado sira, Mesa hato’o informação ba plenário kona-ba Bancada sira ne’ebé maka hato’o ona carta ba Mesa kona-ba Indicação Deputado Jovem ne’ebé mak ho idade máximo tinan 45. Nune’e mós distribui ba Deputado sira relatório hussi delegação Deputado Parlamento Nacional iha Conferência Regional UIP-ONU, iha Malásia.
Iha sessão plenária ne’e, iha mos declaração politica hussi Bancada Parlamentar FRETILIN kona- ba Comemoração Loron Força Armada Libertação Nacional Timor-Leste (FALINTIL), iha dia 03 de março de 2020, declaração ne’e apresenta hussi Deputado Francisco Miranda Branco.
Iha intervenção diversas, Deputado sira questiona problemas necessidade básico mak hanessan, problema educação mak hanessan professores contratado continua la simu salario no professores permanente sira la simu retroativo to’o agora; problema mota sobu comunidade nia to’os no uma iha área rurais balun; Falsificação ossan ne’ebé mak viral iha media social; Problema Estrada no pontes; problema ema desconhecido baku veteranos Reis Kadalak; Problema bee-moos no eletricidade; Problema Saúde; Ahi han Colégio Infantil Sagres maliana; Problema coronavírus no mos informação importante sira seluk.
Hatán ba problema ne’ebé levanta hussi Deputado sira, Ministro da Reforma legislativa e Assuntos parlamentares, Fidélis Leite Magalhães hatete, problema iha Ataúro tuir relatório Comissão D nian, oras ne’e ministério relevante halo daudaun serviço balun hanessan hadi’a no halo luan estrada iha fatin refere; Relaciona ho ossan falso, ne’e serviço autoridade segurança nian; Estrada Baucau ne’ebé halo ho cimento tuir técnico sira katak ne’e serve no di’ak; Problema Ahi han Colégio Maliana iha reunião Conselho Ministro, Chefe Governo fó ona orientação ba Ministério relevante sira hodi resolve. Informação seluk sei encaminha nafatin ba ministério competente hodi toma atenção no resolve.
Reunião ne’e preside hussi Presidente Parlamento Nacional, Arão de Jesus da Costa Amaral, acompanha hussi membro da Mesa sira, no hetan presença hussi Ministro da Reforma Legislativa e Assuntos Parlamentares, Fidelis Leite Magalhães.
