Pagina Inicial»Noticia
Presidente do Parlamento Nacional, Arão Noé de Jesus da Costa Amaral, acompanha hussi Vice-Presidente, Maria Angelina Lopes Sarmento, halo abertura ba Seminário Nacional ho tema identifica causa no buka solução “ hamutuk hodi hatete hadomi bebe hadomi Futuru no hatete lae ba infanticídio, iha loron 12 fulan dezembro tinan 2019, iha salão Lalini Larigutu, Colmera Díli
Iha Presidente do Parlamento Nacional nia discurso hatete caso infanticídio ka soe bebe ou oho bebe, ne’e sai hanessan obrigação ema hotu nian hodi tau atenção, caso ida-ne’e sai hanessan fenómeno foun ida iha ita nia sociedade, fenómeno ida ne’ebé xoke ita nia consciência nu’udár humano.
Presidente mos haktuir liuliu tan tuir dados iha nível nacional registo caso soe bebe hamutuk rua nulu ressin lima (25) ida ne’e seidauk sura ho bebe ne’ebe mate ka inan aman abandona. Realidade ida ne’e hatudu degradação moral iha ita nia sociedade hatudu mos katak sentido no consciência humano mihis ba daudauk bainhira ita ho consciência oho no soe bebe iha fatin lixo.
Além de ne’e, Presidente mós realça liu tan katak fenómeno infanticídio iha ita nia sociedade causa hussi fator principal sira mak hanessan: invasão tradição mundo moderno ne’ebe afeita sociedade Timor Leste; Inan-Aman sira lakon autoridade iha família, Professor sira lakon autoridade iha escola no Invasão hussi Informação no Tecnologia.
Iha biban ne’e Presidente mós fó solução ba fenómeno ne’ebé iha maka hussu ba inan aman sira atu educa labarik sira liuliu oan feto atu moris tuir simples tuir condição economia família nian no mós Órgão Estado hanessan Parlamento Nacional ho governo precisa cria lei ida hodi censura ba sítio pornográfico sira.
Depois de discurso Presidente, continua kedas ho apresentação matéria ba dadeer nian hussi orador sira mak hanessan: Perspetiva Igreja Católica kona-ba caso soe bebe iha Timor-Leste no oinsá fó solução, matéria ne’e apresenta hussi Madre Provincial Canossiana Díli, Guilhermina Marçal Fdcc; perspetivas UNICEF iha Timor-Leste kona-ba possíveis medida ba caso soe bebe no oinsá lições aprendidas hóssi Nação seluk, matéria ne’e apresenta hussi Representante UNICEF iha Timor-Leste, Valerie Taton; Papel Ministério Saúde nian politica hodi soluciona no previne caso soe bebe iha Timor-Leste, matéria ne’e apresenta hussi Chefe Departamento Saúde reprodutiva Ministério Saúde nian, Isabel Gomes; no papel Policia Cientifica Investigação Criminal nian kona-ba caso soe bebe iha Timor-Leste, tema ne’e apresenta hussi Diretor Nacional PSIC, Vicente Fernandes Brito.
Parte lokraik nian mak hanessan: Política Ministério da Educação nian atu previne caso soe bebe ba estudante sira, Tema ne’e apresenta hussi Vice-Presidente INFORDEPE, Ana Jesuína Fernandes; Oinsá ALFELA nia recomendação kona-ba casso soe bebe ne’ebe mak loron ba loron sempre as ba beibeik, Tema ne’e apresenta hussi Advogada Dra. Marcelina Amaral; Procuradoria-Geral da Republica nia ponto de vista kona-ba caso soe bebe iha timor leste liuliu liga ba código penal, tuir publico nia hare feto mak sai vitima, matéria ne’e apresenta hussi Adjunto Procurador-Geral da República, Afonso Lopes; knaar casa vida nian ba atendimento relaciona ho caso soe bebe iha Timor leste, matéria ne’e apresenta hussi Diretora Casa Vida, Susana Ximenes.
Seminário ida-ne’e loke direita hussi Presidente Parlamento Nacional, Arão Noé de Jesus da Costa Amaral no encerra hussi Presidente do Grupo das Mulheres Parlamentares de Timor Leste (GMPTL), Lídia Norberta dos Santos.
Participa iha seminário ne’e mak hanessan, Presidente Parlamento Nacional, Arão Noé de Jesus da Costa Amaral, Vice-Presidente Parlamento Nacional, Maria Angelina Lopes Sarmento hamutuk ho deputadas sira hussi GMPTL, Provedora dos Direitos Humanos e Justiça, Chefes do Sucos, Estudantes nomos convidados sira seluk.
