Presidente Parlamento Nacional, Arão Noé de Jesus da Costa Amaral, halo reunião mensal ho Presidente da Republica, Fransisco Guterres Luo-Lo, iha loron 25 fulan setembro tinan 2019, Iha Palácio Presidencial Nicolau Lobato, no Bairro-Pite, Díli.
Iha reunião ne’e ho objetivo, Presidente Parlamento Nacional informa Atividades durante tempo ressesso nian, no mos informa konaba convite hussi União Inter-Parlamentar (UIP) mai Parlamento Nacional ne’ebé hussu atu bele ratifica ona tratado kona ba armas nucleares, tanba entre nação 180 resin, Timor-Leste seidauk ratifica tratado ida ne’e, maibe ida ne’e kabe ba competência Governo nian.
Além de ne’e, Presidente Parlamento Nacional mos, informa ba Presidente da República kona ba, data entrega orçamento Geral do Estado 2020 ne’ebé Governo promete ba iha loron 15 fulan outubro tinan 2019, nomos, informa kona-ba Legislação sira ne’ebé mak sei iha processo discussão hamutuk legislação hat (4) mak hanesan hanesan Lei Anti Corrupção iha Comissão A, iha faze discussão Especialidade, Lei Códico Mineiro iha Comissão D, iha faze preparação relatório no Parecer, Lei rua (2) ne’ebe mak Presidente da Republica veta no tuir decisão hussi Tribunal katak inconstitucionalidade, maibe Lei rua nee sei agenda ba iha dia 8 fulan outubro tinan 2019 hodi halo apreciação no Parlamento Nacional sei foti decisão ba legislação rua ne’e.
Ikus liu, Presidente Parlamento Nacional informa ba Presidente da Republica konaba Parlamento Nacional sei halo decisão ba assentimento ba deslocação Presidente da Republica nian ba Indonesia ho Japão, sei debate iha segunda feira, loron 30 fulan setembro tinan 2019.
