Parlamento Nacional, liu hussi reunião Plenária ordinária iha loron 24 fulan setembro tinan 2019, fó voto de pesar ba matebian Reverendíssimo Padre João de Deus Pires, SDB ho 45 votos a favor, 0 contra no 0 abstenções. Padre João moris iha Morais, Município de Mirandela, Distrito de Bragança, Portugal, iha loron 15 de abril de 1928, hahu estudo iha ordem Salesianos nian iha tinan 1942, no ordena ba Padre iha loron 08 fulan Julho tinan 1956. Padre João mos fó nia contribuição ba processo luta ba independência Timor-Leste nian, ho nune’e iha tinan 2012, Estado Timor-Leste condecora ho Ordem Dom Martinho Lopes.
Entretanto iha intervenções diversas nian, Deputado sira questiona makas kona-ba kazu oho mate joven ida iha Aimutin no mos kazu agressão física ba Inan deficiente ho naran Nina. Alem de ne’e, Deputado sira questiona mos tratamento protocolar ba Parlamentares sira wainhira participa iha cerimonia ruma ne’e mak Governo convida, tinta passadeiras iha estrada sira ne’ebé mak komesa lakon, cria hospital nacional moras mental nian iha Díli, problema eletricidade, bee moos, estrada, iha capital Díli inclui município balun.
Em resposta ba preocupação hussi Deputado sira, Ministro da Reforma Legislativa e Assuntos Parlamentares, hatete, acontecimento iha Aimutin ne’e, Primeiro Ministro fó ona orientação direta ba Ministério relevante atu toma ação hodi responde ba situação ne’e. Nune’e mos situação agressão física ba inan feto ne’e, Governo condena makas atitude ida ne’e hanesan crime público, no PNTL iha dever hodi kaer autor sira no submete ba processo justiça nian. Serviço Protocolo nian, MRLAP prepara no haruka ona Lei Protocolo ba Ministro dos Negócios Estrangeiros e Cooperação, hein parecer hussi MNEC. Liga ba preocupação sira seluk, sei hato’o iha reunião Conselho de Ministro hodi tau prioridade iha ação no iha orçamento 2020 nian.
Plenária mos halo discussão no votação ba pedido de autorização ba Sra. Deputada Elvina Sousa Carvalho atu presta depoimento hanessan testemunha ba processo judicial. Pedido de autorização ne’e aprova ho 38 votos a favor, 1 contra e 2 abstenções, ho nune’e plenária autoriza Deputada presta nia depoimento hanesan testemunha bele liu hussi presencialmente, bele mos liu hussi carta.
Sessão Plenária ne’e preside hussi Presidente do Parlamento Nacional, Arão Noé de Jesus da Costa Amaral, acompanha hussi membro da Mesa sira, ho presença Ministro da Reforma Legislativa e Assuntos Parlamentares, Fidélis Leite Magalhães.
