Pagina Inicial»Noticia
Parlamento Nacional liu hussi reunião Plenária Ordinária, iha loron 09 fulan julho tinan 2019, decide prolonga nia período funcionamento normal, liu hussi aprovação Projeto de Deliberação do Parlamento Nacional n.o 4/V (1ª) Prolongamento do Período Normal de Funcionamento, ho 36 votos a favor, 18 contra no 0 abstenções.
Projeto de deliberação ne’e apresenta hussi Deputado sira; Patrocino Fernandes dos Reis (CNRT), Francisco de Vasconcelos (PLP), António Nobre Tilman (KHUNTO), Mariano Assanami Sabino Lopes (PD), António Benevides (PUDD) no Isabel Ximenes (UDT/FM).
Prolongamento ba período normal funcionamento too loron 15 fulan agosto, ho objetivo atu Deputado sira discute no aprova ba alteração Lei lima hanessan; Lei Tributaria, Lei do Fundo Petrolífero, Lei das Atividades Petrolíferas, Lei sobre Tributação dos Contratantes de Bayu-Undan no Lei sobre o Desenvolvimento Petróleo do Mar de Timor.
Hafoin aprovação Projeto de Deliberação, Deputado sira continua halo votação ba pedido de suspensão de funções (levantamento de imunidade) ba Deputado Leandro Lobato ho 35 votos a favor, 4 contra no 1 abstenção.
Aprovação no votação ne’e hala’o iha Período da Ordem do Dia, enquanto iha Período de Antes Ordem do Dia nian, liu hussi intervenções diversas, Deputado sira preocupa kona-ba timoroan ida ne’ebé desconfia lakon iha Jakarta Indonésia, acontecimento confronto iha Município Liquiçá, timoroan ida ne’ebé hetan castigo hela iha Nação China, inclui preocupação sira kona-ba infraestrutura básica sira hanessan estrada, bee moos, eletricidade no seluk tan.
Preocupação hirak ne’e, Deputado sira sugere atu Governo liu hussi ministério competente sira bele resolve problema hirak ne’ebé comunidade sira enfrenta.
Ministro da Reforma Legislativa e Assuntos Parlamentares, Fidélis Manuel Leite Magalhães, hatete preocupação hirak ne’e sei encaminha ba ministério relevante sira hodi resolve, maibé iha preocupação balun ne’ebé Deputado sira questiona, horas ne’e daudaun ministério sira esforço no resolve daudaun.
Sessão Plenária ne’e preside hussi Presidente do Parlamento Nacional em exercício, Maria Angelina Lopes Sarmento, acompanha hussi membro da Mesa sira, no hetan presença hussi Ministro da Reforma Legislativa e Assuntos Parlamentares, Fidélis Manuel Leite Magalhães.
