Pagina Inicial»Noticia
Parlamento Nacional liu hussi Sessão Plenária ordinária, iha loron 01 de julho de 2019 ho agenda nº 117/V (1ª) halo debate ho Primeiro-Ministro kona-ba processo transparência, no prestação contas iha Região Administrativa Especial de Oecússi Ambeno (RAEOA), inclui mós utilização sistema free balance iha RAEOA no situação atual kona-ba processo Companhia Lighthouse Corporation Pty Ltd hassoru Estado Timor-Leste.
Iha intervenção Primeiro Ministro, Taur Matan Ruak hateten, kona-ba Empresa Lighthouse Corporation Pty Ltd ne’ebé lori Governo Timor-Leste ba Tribunal Victoria relaciona ho Governo Timor-Leste hapara nia contrato, no Roo Haksolok, Governo sei la hussik Dr. Mari Alkatiri atu responsabiliza ba caso ne’e messak. Governo ida ne’e sei la tau sala ba ema ida. Governo ho Dr. Mari Alkatiri preparado tiha ona, atu luta para hetan solução ba Roo Haksolok. Caso ne’e liga ba país seluk, no dignidade Estado Timor-Leste nian, Governo precisa unidade hussi força política iha rai-laran hodi hassoru interesse nação seluk.
Nia hatutan, liga ba assunto sira ne’ebé ilícitos nian, ne’e lidera hussi Ministro de Estado da Presidência do Conselho de Ministros, Hermenegildo Augusto Cabral Pereira. Arbitragem ne’ebé inicia hussi Lighthouse Corporation Pty Ltd contra Governo Timor-Leste iha loron 14 fulan-janeiro 2015 ne’e, Tribunal Supremo Victoria considera ona katak la iha jurisdição kona-ba conflito ne’e. Companhia Lighthouse Corporation Pty Ltd responsabiliza ba custo total sira hussi processo arbitragem nian, inclui custo sira tribunal nian, no selu ba Timor-Leste ossan dolar milliaun 1,5 no custo ho despesa legal sira, reforça Taur Matan Ruak.
Iha biban ne’e, Ministro de Estado da Presidencial do Conselho de Ministros esclarece katak Roo Haksolok la’ós Timor Leste nia falhanço. Causa loloos ba problema ne’e mak empresa na’in ne’ebé responsável ba processo ne’e mate tiha. Ikus mai Governo continua processa hikas fali ho empresário nia oan mane, maibé la iha cooperação hussi autoridade sira, haktuir Ministro Hermenegildo Pereira.
Sessão Plenária ne’e preside hussi Presidente do Parlamento Nacional, Arão Noé de Jesus da Costa Amaral, acompanha hussi membro da Mesa sira, no hetan presença hussi Primeiro-Ministro, Taur Matan Ruak ne’ebé acompanhado hussi Ministro da Reforma Legislativa e Assuntos Parlamentares, Fidélis Manuel Leite Magalhães, Ministro do Estado da Presidência do Conselho de Ministro, Hermenegildo Augusto Cabral Pereira, no Ministra Finanças Interina, Sara Lobo Brites.
