Pagina Inicial»Noticia
BOBONARO—Parlamento Nacional Timor-Leste liu-hossi Secretariado-Geral, Direção Comunicação, Divisão Relações Pública, Comunicação e Educação Cívica, realiza seminário ho duração loron rua, hahú iha loron 25 to’o 26 fulan-juñu 2019, iha Posto Administrativo Maliana, Município Bobonaro.
Seminário ho tema ‘’Hakbesik Parlamento Nacional ba Comunidade Bobonaro, Natura no Funcionamento Órgão Soberano Daruak’’ ne’e, loke direitamente husi Secretário-Geral Adjunto Parlamento Nacional, Luís da Costa Nascimento Alves.
Iha intervenção, Secretário-Geral Adjunto ne’e haktuir katak transforma Timor-Leste hodi sai país ida ho rendimento médiu-aas, tuir Metas Gerál hóssi Plano Estratégico Desenvolvimento Nacional (PEDN) 2011-2030 ne’e, exigi cada Órgão soberano estado atu desenha nia programa annual no quinquenal atu implementa.
Nia hatutan, ho responsabilidade bo’ot ida ne’e, Secretariado Geral hóssi Órgão Soberano Daruak ne’e, realiza Seminário ho objetivo atu refresca no eleva conhecimento ninia comunidade rassik iha Município Bobonaro kona-ba ninia Natura no Funcionamento rassik, tuir metas Parlamento Nacional nian ne’ebé traça ona iha Plano Estratégico Parlamento Nacional 2017 to’o 2022. Ho ida ne’e, Secretariado Geral iha esperança bo’ot atu ita-nia comunidade, liu-liu autoridade Local hóssi Posto Administrativo Maliana, no estudante sira hóssi secundária sira hóssi Escola Secundária Geral Dom Martinho, Escola Secundária Técnica Vocacional Malibaca, Escola Técnica Informática Maliana bele compreende no inteira informação hotu, ne’ebé partilha hóssi Dirigente no Técnico hóssi Secretariado durante loron rua ne’e.’’
Iha biban ne’e, Iha intervenção abertura nian, Diretor Educação, Juventude no Desporto Municipal, Alcino Barreto João confessa katak ‘’Desde tinan 2016 ne’ebé assume cargo hanessan Diretor, seminário ida ne’e hanessan seminário dahuluk ne’ebé organiza hóssi Secretariado Parlamento Nacional hodi hariku estudante sira nia conhecimento. Hodi Ministério nia naran iha nível Municipal ho Diretor Escola Secundária Geral Dom Martinho, Escola Secundária técnica Vocacional Malibaca, Escola técnica Informática, no Autoridade Local sira, agradece ba iniciativa hóssi Secretariado Geral Parlamento Nacional Timor-Leste nian, hodi partilha informação kona-ba lala’ok servisu representante povo, ne’ebé cidadão rassik mak hili, liu- husi eleição geral parlamentar nian.’’
Nia apela, ‘’Dirigente escola, educador, no estudante sira ne’ebé hola parte ba iha Seminário durante loron rua ne’e, bele aproveita ho didi’ak tanba conhecimento ne’e la aproveita fatin. Conhecimento geral kona-ba prosedura serviço no produto servico cada Órgão soberano estado nian, nu’udar cidadão ne’ebé di’ak, liu-liu estudante sira ne’ebé nu’udar continuadores, obrigatoriamente hatene. Hatene sé lo’os mak ita-nia ukun-na’in no saida mak sira produz durante sira-nia prodús durante sira-nia mandato, no oinsá atu continuadores bele continua. Sai cidadão di’ak la’ós de’it hasees-an husi hahalok crime maibé tenke hatene informação atualizado sira. Informação sira ne’e mós sempre mosu iha exame Local ho Nacional sira,’’ reforça Diretor Educação Municipal ne’e.
Iha sikun seluk, Administrador Interino Posto Administrativo Maliana, Egídio Luís Siga iha nia intervenção esclarece, ‘’Uma Fukun Parlamento Nacional hanessan uma cada Cidadão nian, inclui mós Cidadão Bobonaro. Uma ida ne’ebé halibur ita-hotu nia representante hodi hato’o ita- nia aspiração sira, prodúz ita-nia Lei-Inan no Lei-oan sira hodi sai matadalan ba ninia cidadão, no halo acompanhamento ba produto-de-serviço ita-nia governo sira programa desenvolvimento nian. Tan ne’e, apela ba autoridade Local sira, liu-liu chefe suco sira ne’ebé nu’udar organização estado ki’ik liu hóssi governo, atu continua hariku-an ho informação ne’ebé prepara husi equipa Secretariado ne’e. Ho informação ne’e, bele tulun autoridade lokál sira hodi fó apoio ba processo decentralização,’’ tenik Egídio Luis Siga.
Matéria ba seminário ne’e mak, ‘‘Conhece Ha’u-nia Constituição, Parlamento Nacional nu ‘dar Órgão Soberania Timor-Leste, conhece Órgão sira iha Parlamento Nacional no nia função, Funcionamento Comissão Especializada Parlamentar sira iha Parlamento Nacional, Processo Legislativo, no Processo Orçamento Geral Estado. Orador ba seminário ne’e mai hóssi Dirigente no Técnico hóssi Secretariado-Geral Parlamento Nacional.
Seminário ne’ebé realiza ho objetivo hodi habelar informação kona-ba Funcionamento Parlamento Nacional nian, atu alcança missão ‘’Lori Parlamento Nacional ba cidadão’’ ne’e, participa hóssi Superintendente Chefe Polícia Trânsito Esquadra Maliana, oficiais Posto Administrativo, Chefe do Sucos, Chefes Aldeias, Mestres, no estudante secundárias hóssi Escola Secundárias ne’ebé existe iha Posto Administrativo Maliana.
Iha enceramento ba semanário ne’e, Administrador Posto Interino ne’ebé representa mos Diretor Educação Municipal recomenda atu Parlamento Nacional continua dissemina informação kona-ba resultado produto serviço durante mandato ba sidadaun sira, liu-liu lei proposta no projeto lei sira ne’ebé durante ne’e seidauk sensibiliza. Ho nune’e, cidadão sira bele conhece no sai matadalan ba sira nia lala’ok lor-loron nian.
