Funcionário sira Parlamento Nacional simu certificado de reconhecimento iha loron 9 fulan outubro tinan 2015.
Certificado ne’e funcionário sira hetan baseia ba avaliação hussi professores ne’ebé durante ne’e hanorin, no liuliu haree ba participação no dedicação iha curso português, inclui curso intensivo ne’ebé hala’o durante fulan hirak nia laran.
Secretário-Geral Parlamento Nacional, Mateus Ximenes Belo, iha abertura ba cerimónia fahe certificado ne’e agradece ba professor sira ne’ebé durante ne’e hanorin funcionário sira iha Parlamento Nacional.
Nia dehan maski iha dificuldade barak, maibé entre professores no funcionário sira continua esforço hodi aprende língua portuguesa.
«La hatene tanba saida mak funcionário balu la participa máximo, maibé ho nacionalismo, patriotismo tem que aprende língua portuguesa», Secretário-Geral Parlamento Nacional declara.
Tanba envolvimento Timor-Leste iha organização sira iha CPLP, precisa tebes língua portuguesa atu facilita serviço no comunicação ne’ebé di’ak.
Especialmente iha Parlamento Nacional, Secretário-Geral Parlamento Nacional hatete nia sei hussu ba Conselho de Administração atu oinsá bele define loron ne’ebé funcionário sira iha Parlamento tem que ko’alia lian português, no loron ne’ebé tem que ko’alia inglês ho tetun durante semana ida nia laran.
Secretário-Geral Parlamento Nacional sugere ba funcionário sira atu aproveita di’ak oportunidade ne’e, tanba caráter timoroan sira-nian baibain mak ladún aproveita buat ne’ebé gratuito.
Participa iha cerimónia ne’e, além de Secretário-Geral Parlamento Nacional, professor José Carlos Adão, professora Manuela Isidro, no mós professor na’in-rua hussi UNTL, mak professor Ricardo Antunes no professora Susana Mendonça.