Pagina Inicial»Noticia
Parlamento Nacional liu hussi Sessão Plenária ordinária iha loron 27 fulan maio tinan 2019, Deputado sira hato’o preocupação ba Governo relaciona ho bee-moos iha Capital Díli.
Iha Sessão Plenária ne’e mós, distribui carta escrita hussi Diretor Nacional de Distribuição de energia e Eletricidade (EDTL), Diretor Nacional de estrada, pontes e controlo de Cheias no Diretor Nacional de Edificação no mós Coordenador ALFAESA, IP, hodi responde ba preocupação Deputado sira nian, além de ne’e distribui mós relatório kona-ba participação Grupo Nacional AP-CPLP iha São Tomé e Príncipe, Cabo Verde no Portugal.
Sorin seluk, Comissão de Economia e Desenvolvimento apresenta relatório kona-ba visita de fiscalização ba Município Lautém no Viqueque.
Além de ne’e, Bancada CNRT liu hussi Deputado Patrocínio hato’o declaração politica kona-ba sistema free balance. No Bancada PLP liu hussi Deputado Sabino Soares «Guntur» hato’o declaração política kona-ba situação politica horas ne’e daudaun.
Iha sessão plenária ida-ne’e, Deputado sira levanta assunto hirak hanessan Bee-moos iha capital Díli, estacionamento iha terminal Becora, inundação iha Bariki, população iha Mauxiga la acesso ba eletricidade no mós estrada no seluk tan.
Ministro da Reforma Legislativa e Assuntos Parlamentares, Fidélis Manuel Leite Magalhães, hatete assunto sira ne’ebé mak Deputado sira levanta, sei regista no apresenta ba ministério relevante hodi resolve.
Sessão Plenária ne’e Preside hussi Vice-Presidente do Parlamento Nacional, Maria Angelina Lopes Sarmento, acompanha hussi membro da Mesa sira no hetan presença hussi Ministro da Reforma Legislativa e Assuntos Parlamentares, Fidélis Manuel Leite Magalhães.
