Parlamento Nacional, iha 19 outubro 2015, hala’o debate ho Ministério da Saúde hodi discute no hussu informação kona-ba serviço tomak ne’ebé Ministério ne’e halo durante tinan ida nia laran.
Debate ne’e Parlamento Nacional realiza baseia ba Regimento Parlamento Nacional, artigo 152º nian, kona-ba debate ho ministério sira ne’ebé durante ne’e Parlamento Nacional halo mós ho ministério seluk.
Tuir guião ne’ebé Mesa, liuhossi reunião líder Bancada Partido sira-nian, prepara, debate ne’e la’o durante horas haat nia laran. Iha debate ne’e Deputado sira questiona maka’as kona-ba problema sira-ne’ebé durante ne’e população sira levanta hanessan: menos ai-moruk, atendimento de saúde iha hospital sira, falta ambulância no seluk tan.
Além de ne’e, Deputado sira mós preocupa ho execução orçamento ba Ministério da Saúde ne’ebé sei mínimo.
Hatán ba preocupação sira ne’e, Ministra da Saúde, Maria do Céu Sarmento Pina da Costa, hatete katak nia hamutuk ho equipa tomak Ministério da Saúde nian continua halo esforço hodi resolve problema sira ne’ebé mossu iha ministério laran. Nia mós dehan katak Ministério da Saúde iha nia plano estratégico ne’ebé hatudu dalan atu resolve problema sira ne’ebé durante ne’e acontece.
