Pagina Inicial»Noticia
Presidente Comissão F iha Parlamento Nacional ne’ebé trata assuntos Educação, Saúde, Segurança Social e Igualdade Género, Deputada Maria Gorumali Barreto, ho nia membro sira, Presidente Comissão G ne’ebé trata assuntos Educação, Juventude, Cultura e Cidadania, Deputada Albina Marca Freitas, no Presidente GMPTL (Grupo Mulheres do Parlamentares de Timor Leste), Deputada Lídia Norberta dos Santos, ho nia membro sira, participa iha cerimónia «Campanha Loron 16 Ativismo Violência Hassoru Feto no Labarik Feto» ho tema Hapara Forma Violência Oin-oin Hassoru Feto no Hateten Lae ba Violência Hassoru Feto no Labarik Feto, ne’ebé organiza hussi Secretária de Estado da Igualdade e Inclusão, iha loron 25 fulan novembro tinan 2018, iha Posto Administrativo Maubisse, Município Ainaro.
Iha discurso Presidente Comissão F, Deputada Maria Gorumali Barreto, hatete atu concretiza Lae ba Violência Hassoru Feto no Labarik Feto Sira, precisa serviço hamutuk ho parceiro hotu-hotu, liuliu mane sira, no precisa legislação balun hodi garante no defende direito sira ne’e.
Iha cerimonia ne’e fahe mós camisola ne’ebé hakerek ho liafuan «Mai Ita Hotu Rona, Respeita no Considera ba Malu no Hadomi Malu» ba Administrador posto Administrativo Maubisse, Chefe Suco Maubisse, Comandante PNTL Maubisse, Representante feto sira, Representante estudantes feto no mane, no representante professor sira ho objetivo atu sensibiliza assunto feto no labarik feto iha comunidade no contribui ba desenvolvimento nacional.
Participa iha cerimonia ne’e mak hanessan estudante sira, autoridade local sira, Comandante PNTL ho nia equipa sira, representante parceiro sira hussi Secretária de Estado da Igualdade e Inclusão hanessan; representante hussi Ministério Solidariedade Social e Inclusão, representante Comissão Função Publica, Plan-Internacional, the Asian Foundation, Australian-Aid, UNFPA, UN Women, Nabilan, no From the People of Japan.
