Pagina Inicial»Noticia
Presidente do Parlamento Nacional, Arão Noé de Jesus, participa iha comemoração X aniversario Fundação Luta ba Futuro, iha loron 9 fulan novembro tinan 2018, iha Município Manufahi.
Antes comemora aniversario fundação ne’e, Presidente do Parlamento halo uluk visita ba Suco Betano hodi haree uma ne’ebé fundação ne’e oferece ba família vulnerável sira.
Presidente do Parlamento Nacional sai orador ba seminário hodi comemora aniversario refere ho tema «Visão Parlamento Nacional nu’udar Representante povo no sociedade Civil nia função nu’udar controlo social iha Desenvolvimento Nacional». Iha explicação Presidente do Parlamento Nacional katak papel sociedade civil nian iha desenvolvimento nacional haree hussi aspeto rua hanessan implementação programa Governo nian, iha aspeto ne’e sociedade civil nia papel hamutuk ho autor Estado nian hodi implementa programa Governo, no sociedade civil nu’udar agente controlo social, sociedade civil nu’udar organização não-govermentais ne’ebé direitamente halo supervisão no observação ba realidade implementação programa Governo nian.
Hafoin seminário, Presidente do Parlamento Nacional ho nia comitiva visita mós feira local no halo enceramento ba feira ne’ebé organiza hussi fundação ne’e.
Iha oportunidade ne’e Presidente do Parlamento Nacional mós visita Administração Município Manufahi hodi halo reunião ho Administrador Interino ho nia comitiva sira.
Participa iha comemoração aniversário ne’e mak Presidente do Parlamento Nacional, Presidente Autoridade Município Manufahi, Comandante PNTL Município hamutuk ho doador no convidado sira seluk.
