Pagina Inicial»Noticia
Comissão C ne’ebé trata assuntos Finanças Publicas no Comissão D ne’ebé trata assuntos Desenvolvimento e Economia, iha Parlamento Nacional halo audiência ho Chefe Negociador Principal ba Fronteira Marítima, Kay Rala Xanana Gusmão, acompanha hussi Ministro do Petróleo, Ágio Pereira, Jurista Autoridade Nacional de Petrolífero e Minerais, José Celestino, Diretor Timor Gap, Luís M.G.R Martins no Presidente Instituto do Petróleo e Geologia. I.P.G, Hélio Casimiro Guterres, iha loron 6 fulan novembro tinan 2018, iha sala de conferencia do Parlamento Nacional.
Audiência ne’e halo ho objetivo atu rona ideia hussi entidade relevante sira kona-ba Projeto de Lei n.o 1 / V (1a) - Primeira Alteração a Lei n.o 13 / 2005, de setembro – Lei das Atividades Petrolíferas relaciona ho investimento sossa ações 30% hussi Conoco Philips ho montante $350 milhões, nune’e bele ajuda Deputado sira halo alteração ba lei refere ho dalan ne’ebe loos no justo, la prejuízo artigo seluk iha lei petrolífero nian.
Durante audiência, Chefe Negociador Principal apresenta ideia sira kona-ba artigo balun ne’ebé precisa altera iha lei refere. Aliem de ne’e, informa mós kona-ba processo tomak negociação delimitação fronteira marítima ho Governo Austrália to’o sossa ações Conoco Philips nian. Hafoin rona tiha explicação hussi Chefe Negociador, Deputado sira sugere atu Chefe Negociador bele convoca reunião ho líder bancada sira nune’e bele entende assunto ne’e ho di’ak.
Ministro do Petrolífero, Ágio Pereira, ho nia equipa sira mós apresenta questão técnico kona-ba receitas Bayu Undang ho Greater Sunrise iha futuro no campo potencial sira seluk.
Iha loron 7 fulan novembro tinan 2018, Comissão rua ne’e continua halo audiência ho Juíza Jacinta da Costa ho nia equipa sira hussi Camara de Contas nian hodi discute kona-ba fiscalização preventiva ba ato irregularidade ruma kona-ba alteração lei refere.
Nune mós Governador Banco Central de Timor Leste, Abrão Vasconcelos, ho nia equipa sira ko’alia liu kona-ba requisito no principio sira diversificação ba investimento ida.
Audiência preside hussi Presidente Comissão C, Deputada Maria Fernanda Lay no Presidente Comissão D, Deputada Virgínia Ana Belo acompanha hussi membro sira comissão nian.
