Pagina Inicial»Noticia
Silviana Maria da Graça Bere, moris iha loron 1 fulan maio tinan 2000,iha suco Namolessu, Posto Administrativo Liquidoe, Município Aileu, hetan oportunidade hodi sai Presidente do Parlamento Nacional iha minuto 40 nia laran.
Iha loron 11 fulan outubro tinan 2018, iha 08h45 too 09h25 Silviana hakat ba Gabinete do Presidente do Parlamento Nacional ho acompanhamento hussi corpo de segurança Presidente nian ne’ebé simu diretamente hussi Presidente do Parlamento Nacional, Arão Noé de Jesus da Costa Amaral, no entrega knaar ba Silviana hodi hala’o serviço tuir agenda ne’ebé mak prevê ona.
Hafoin simu knaar hanessan Presidente do Parlamento Nacional, Silviana preside kedas reunião ho Presidente Comissão Nacional das Eleições, Alcino de Araújo Barris, ho nia equipa, iha gabinete Presidente nian.
Ação no simulação ne’e organiza hussi Plan Internacional ne’ebé antes ne’e coordena ona ho Presidente do Parlamento Nacional hodi comemora loron mundial ba labarik feto sira.
Liu tiha minuto 40, Presidente do Parlamento Nacional, Arão Noé de Jesus, entrega prenda ba Silviana hanessan Tais, livro Constituição RDTL, no Regimento Parlamento Nacional antes hakat sai hussi Gabinete Presidente nian.
Nune’e Presidente do Parlamento Nacional continua hikas reunião ho Presidente CNE ho nia equipa sira hodi ko’alia kona-ba serviço CNE nian.
Iha reunião ne’e Presidente CNE convida Presidente do Parlamento Nacional atu participa iha lançamento relatório CNE nian kona-ba eleição presidencial no parlamentar ba tinan 2017, iha loron 18 fulan outubro tinan 2018.
Além de ne’e informa mós kona-ba preparação tomada de posse ba Comissario Afonso Carmona hodi troca Comissario cessante Duarte Tilman, ne’ebé durante ne’e assume knaar hanessan Vice-Presidente CNE, inclui assunto sira seluk.
Hafoin reunião ho Presidente do Parlamento Nacional, Presidente CNE ho nia equipa sira continua halo reunião ho Comissão A hodi informa assunto ne’ebé hanessan.
