Pagina Inicial»Noticia
Parlamento Nacional liu hussi reunião Plenária extraordinária iha loron 4 fulan outubro tinan 2018 halo apreciação ba Conta Geral de Estado tinan 2016 nian.
Iha discussão ne’e bancada FRETILIN liu hussi Deputada Maria Angelica Rangel da Costa dos Reis, hato’o declaração politica hodi hussu ba Governo considera recomendação sira ne’ebé tribunal apresenta.
Hafoin declaração política, Comissão C ne’ebé trata assuntos Finanças Públicas, apresenta relatório no parecer comissão nian kona-ba Conta Geral de Estado ne’e.
Ministra das Finanças em exercício Sara Lobo Brites, hatete Governo esforço makas hodi implementa recomendação sira hussi tribunal, hanessan mós preocupação sira hussi Deputado sira-nian oinsá hatuur loloos principio orçamento ninian.
Governo continua cria condição sira ne’ebé eficiente atu halo atendimento ne’ebé di’ak no garante boa governação. Governo reconhece katak sei iha deficiência balun iha sistema orçamento ninian.
Entretanto Deputado sira hussu ba Governo liuliu Ministério das Finanças hodi halo tuir recomendação sira hussi tribunal nune’e garante duni sistema financeira ida ne’ebé di’ak liu no eficiência iha futuro mai.
Liu hussi discussão naruk, Deputado sira aprecia Conta Geral de Estado ne’e voto unanimidade 55 votos a favor, 0 contra no 0 abstenções.
Sessão Plenária ne’e preside hussi Presidente do Parlamento Nacional, Arão Noé de Jesus, acompanha hussi membro da Mesa sira no hetan presença hussi Ministra das Finanças em exercício, Sara Lobo Brites, no Secretário de Estado da Comunicação Social, Merícico Juvenal dos Reis.
