Pagina Inicial»Noticia
Parlamento Nacional liu hussi reunião Plenária ordinária, iha loron 24 fulan setembro tinan 2018, halo apreciação ba relatório atividade Comissão da Função Pública (CFP), ba tinan 2017 nian.
Relatório atividade ne’ebé apresenta hussi Presidente da CFP ne’e menciona kona-ba atividade CFP nian iha tinan 2017, hanessan; visão no missão ba segundo mandato Presidente CFP nian, atendimento di’ak ba publico, elaboração caderneta funcionário público nian, promoção ba cargo chefia sira to’o uso de património Estado no assunto seluk relaciona ho serviço função pública nian.
Hafoin apresentação relatório continua kedas ho sessão hussu ho hatán hussi Deputado sira no resposta hussi Comissão Função Pública. Deputado hussu barak liu kona-ba assistência, controlo no promoção careira ba funcionário sira inclui atividade seluk ne’ebé halo hussi CFP.
Deputado sira mós continua fó confiança no encoraja CFP hodi melhoria serviço iha futuro hodi assegura funcionamento maquina Estado nian ho eficiência no eficácia.
Apreciação relatório ne’e hala’o iha período da ordem do dia nian, enquanto iha período de antes da ordem do dia nian, Deputado sira liu hussi intervenção diversa sira levanta assunto importante sira ne’ebé liga ba desenvolvimento povo no nação.
Além de ne’e bancada parlamentar CNRT mós apresenta nia declaração política liga ba construção projeto balun ZEEMS (Zona Especial de Economia Mercado Social) nian ne’ebé afeta ba comunidade balun.
Sessão Plenária ne’e preside hussi Presidente do Parlamento Nacional, Arão Noé de Jesus, acompanha hussi membro da Mesa sira no hetan presença hussi Ministro da Reforma Legislativa e Assuntos Parlamentares, Fidélis Magalhães.
