Pagina Inicial»Noticia
Parlamento Nacional, iha loron 28 fulan agosto tinan 2018, continua halo debate ba Orçamento Geral de Estado (OGE) ba tinan 2018 iha generalidade.
Debate loron daruak ne’e loke hussi Presidente do Parlamento Nacional, Arão Noé de Jesus, iha horas 09:51 dadeer. No fó kedas tempo ba Governo liu hussi Primeiro-Ministro, Taur Matan Ruak hodi fó resposta relaciona ho relatório e parecer Comissão C nian ne’ebé apresenta iha loron dahuluk.
Iha resposta Primeiro-Ministro nian ba relatório parecer ne’e katak Governo considera no simu relatório ne’e liuliu sugestão lubuk ida-ne’ebé Comissão C tau iha relatório refere.
OGE ne’e rassik ho objetivo atu garante funcionamento maquina de Estado, inclui necessidade urgente ne’ebé Governo sei resolve iha tempo badak.
Hafoin resposta Primeiro-Ministro nian, continua ho intervenção hussi Deputado sira liga ba OGE ne’e. Deputado sira hussu kona-ba eficiência no eficácia hussi OGE ne’e liga ba tempo ne’ebé limitado ona, inclui projeto sira ne’ebé sei pendente no divida sira ne’ebé mak iha.
Liu hussi discussão naruk, Presidente do Parlamento Nacional encera discussão ne’e iha horas 18:30 no sei continua debate iha loron 29 fulan agosto tinan 2018.
Sessão debate ne’e Preside hussi Presidente do Parlamento Nacional, Arão Noé de Jesus, acompanha hussi membro da Mesa, no hetan presença hussi Primeiro-Ministro, Taur Matan Ruak, ho membro Governo sira.
