Pagina Inicial»Noticia
Comissão A iha Parlamento Nacional, ne’ebé trata assuntos Constitucionais e Justiça no Comissão E ne’ebé trata assuntos Infraestruturas, halo fiscalização ba Comissão Anticorrupção (CAC), iha loron 9 fulan agosto tinan 2018.
Comissão rua ne’e halo fiscalização ba CAC relaciona ho informação balun ne’ebé Deputado sira rona kona-ba funcionamento ka atividade CAC nian ne’ebé enfrenta dificuldade liga ba mandato Comissario CAC nian ne’ebé termina ona iha fulan kotuk ba, hodi afeta ba andamento serviço CAC nian.
Iha fiscalização ne’e Deputado sira Comissão A ho E halo reunião ho Adjunto Comissario cessante Rui Pereira dos Santos ho nia diretor sira, hodi rona preocupação sira liuliu kona-ba salario ba funcionário sira, condição edifício CAC nian inclui preocupação sira seluk.
Relaciona ho preocupação ne’e, Presidente Comissão A Deputada Carmelita Caetano Moniz, hatete comissão sei halo relatório e parecer ba Plenária hodi discute no buka solução, masque nune’e Deputado sira aprecia ho serviço CAC nian durante ne’e.
Iha loron hanessan Comissão E ne’ebé lidera hussi Presidente da Comissão Abel Pires, halo mós fiscalização ba EDTL Comoro hodi haree condição real liuliu kona-ba gerador sira ne’ebé mak uluk usa hodi fornece energia eletricidade ba comunidade liuliu capital Díli.
Durante fiscalização rona preocupação barak hussi Diretor Técnico EDTL Comoro kona-ba dificuldade hirak ne’ebé EDTL Comoro enfrenta liuliu kona-ba manutenção ba gerador sira inclui contrato companha nian hodi garante funcionamento ka operacionalização EDTL Comoro nian, tanba EDTL Comoro ne’e rassik bele substitui central elétrica Hera bainhira avaria.
Presidente Comissão E hatete fiscalização ne’e halo hanessan continuação ba fiscalização ne’ebé comissão halo ona ba Central Elétrica Hera hodi haree diretamente condição ne’ebé central elétrica ne’e enfrenta nune’e bele buka solução ba dificuldade hirak ne’ebé iha.
