Pagina Inicial»Noticia
Comissão E iha Parlamento Nacional ne’ebé trata assuntos Infraestruturas iha loron 2 fulan agosto tinan 2018 halo audiência ho Chief executive officer (CEO) hussi companha Telkomcel, Yogi Riski Bahar, ho nia equipa sira iha sala Comissão E Parlamento Nacional.
Iha audiência ne’e companhia Telkomcel atualiza informação ba Parlamento Nacional liu hussi Comissão E kona-ba progresso iha área telecomunicação nian ho presença Telkomcel iha Timor-Leste durante tinan lima nia laran.
CEO Telkomcel explica plano Telcomcel iha futuro sei halo investimento ba fibra ótica (optical fibre), iha Timor-Leste, programa ne’e rassik apresenta uluk ona iha Governo anterior.
Investimento cabo submarino ne’e quase $15 milhões, ne’ebé sei dada hussi Atambua Indonésia mai Timor-Leste.
Presidente Comissão E, Deputado Abel Pires da Silva hatete, negociação ba investimento ne’e sei halo ho Governo nune’e Parlamento Nacional sei fó nia apoio bainhira investimento ne’e beneficia povo.
Hafoin audiência ho Comissão E, CEO Telkomcel ho nia equipa sira continua halo reunião ho Presidente do Parlamento Nacional, Arão Noé de Jesus, hodi informa kona-ba plano no programa ne’ebé Telkomcel sei halo iha futuro liuliu investimento cabo submarino.
