Pagina Inicial»Noticia
Procuradoria-Geral da República (PGR) liu hussi sessão Plenária ordinária iha loron 31 fulan julho tinan 2018, halo apresentação relatório tinan 2017 nian ba Parlamento Nacional.
Iha relatório ne’ebé apresenta hussi Procurador-Geral da Republica, José da Costa Ximenes, kona-ba serviço tomak PGR nian iha tinan 2017 liuliu kona-ba progresso serviço no desafio hirak ne’ebé PGR hassoru durante tinan 2017.
Além de ne’e ko’alia mós kona-ba caso hirak ne’ebé processo ona no caso hirak ne’ebé pendente nune’e sei contínua iha tinan 2018. No programa prioridade ne’ebé sei hala’o iha tinan 2018, plano estratégico ministério público nian inclui cooperação ne’ebé PGR halo ho nação CPLP sira.
Deputado sira aprecia ho serviço PGR nian durante ne’e, no hussu atu contínua melhoria iha futuro nune’e bele garante justiça ba ema hotu.
Além de ne’e Deputado sira mós questiona caso hirak ne’ebé iha ona processo inclui pendente sira liuliu kona-ba caso corrupção ne’ebé envolve hussi entidade Estado nian.
Apresentação relatório ne’e iha Período ordem do dia, enquanto iha período de antes ordem do dia nian distribui carta oficial hussi Diretora Executiva e Presidente Diretivo SAMES .ep (Serviço Autónomo de Medicamentos e Equipamentos de Saúde .ep), relaciona ho preocupação hira ne’ebé hato’o hussi Deputado sira liu hussi Ministro da Reforma Legislativa e Assuntos Parlamentares, Fidélis Magalhães iha reunião Plenária.
Iha sessão Plenária ne’e mós bancada FRETILIN halo declaração politica relaciona ho moção de rejeição ne’ebé apresenta iha momento debate programa VIII Governo Constitucional.
Iha declaração politica ne’e clarifica rasão hirak ne’ebé bancada FRETILIN considera liga ba programa governo nian.
Sessão Plenária ne’e preside hussi Presidente do Parlamento Nacional, Arão Noé de Jesus, acompanha hussi membro da Mesa, no hetan presença hussi Ministro da Reforma Legislativa e Assuntos Parlamentares, Fidélis Magalhães.
