Pagina Inicial»Noticia
Programa VIII Governo Constitucional passa ona iha Parlamento Nacional, iha loron 27 fulan julho tinan 2018 liu hussi votação ba moção de rejeição ho votos 25 a favor, 36 contra no 4 abstenções.
Discussão ba programa ne’e hahú iha loron 25 too 27 fulan julho tinan 2018, ho apresentação Programa VIII Governo Constitucional hussi Primeiro-Ministro, Taur Matan Ruak ho membro Governo balun relaciona ho área temático balun ne’ebé questiona hussi Deputado sira.
Moção de Rejeição ne’e apresenta hussi bancada FRETILIN iha loron dahuluk debate programa ne’e.
Durante debate loron tolu, mossu perguntas barak liuliu hussi parte oposição ne’ebé questiona kona-ba Programa VIII Governo Constitucional. No Deputado sira hussi bloco Aliança Mudança ba Progresso (AMP) fó mós sugestão balun relaciona ho programa ne’e.
Ho discussão naruk, iha loron 27 fulan julho tinan 2018, iha 18h45 kalan liu hussi Secretária Mesa, Maria Terezinha Viegas, halo leitura ba moção de rejeição, no tuir kedas ho votação ba moção ne’e.
Primeiro-Ministro, Taur Matan Ruak, iha nia discurso enceramento hatete Governo otimista sei implementa Programa VIII Governo Constitucional durante mandato tinan 5.
Debate ne’e preside hussi Presidente do Parlamento Nacional, Arão Noé de Jesus da Costa Amaral, acompanha hussi membro da Mesa tomak no marca presença hussi Primeiro-Ministro, Taur Matan-Ruak, ho nia membro Governo tomak.
