Pagina Inicial»Noticia
Parlamento Nacional liu hussi sessão Plenária extraordinária hahú ona halo debate ba loron dahuluk Programa VIII Governo Constitucional, iha loron 25 fulan julho tinan 2018.
Debate Programa VIII Governo ne’e hahú ho lê agenda no guião hussi Presidente do Parlamento Nacional, Arão Noé de Jesus, iha 09h35 dadeer, no tuir kedas ho discurso hussi Primeiro-Ministro, José Maria Vasconcelos «Taur Matan Ruak» kona-ba Programa VIII Governo nian.
Durante discurso Primeiro-Ministro nian sita programa prioridade durante tinan lima VIII Governo nian hanessan área infraestrutura, área saúde, área educação, área agricultura, inclui área sira seluk ne’ebé Governo tau importância hodi realiza durante nia Governação.
Hafoin discurso Primeiro-Ministro nian, continua ho intervenção hussi Deputado sira liuliu bancada oposição hodi questiona programa ne’ebé apresenta hussi governo liu hussi Primeiro-Ministro.
Sessão ne’e continua iha parte loraik ho perguntas hussi Deputado sira no resposta hussi Primeiro-Ministro, Taur Matan Ruak. Masque nune’e iha discussão refere bancada FRETILIN liu hussi presidente bancada Deputado Aniceto Longuinhos Guterres Lopes apresenta moção de rejeição ba programa VIII Governo Constitucional.
Debate programa ne’e hotu iha 18h45 loraik no sei continua debate iha loron 26 fulan julho tinan 2018.
Reunião Plenária ne’e preside hussi Presidente do Parlamento Nacional, Arão Noé de Jesus da Costa Amaral, acompanha hussi membro da Mesa tomak, no marca presença hussi Primeiro-Ministro, Taur Matan Ruak, ho nia membro Governo sira.
