Pagina Inicial»Noticia
Presidente do Parlamento Nacional, Arão Noé de Jesus da Casta Amaral, acompanha ho nia assessor sira, Bruno Lencastre ho Júlio Tomás Pinto, halo reunião ho Presidente do Conselho de Imprensa (CI), Virgílio Guterres ho nia equipa, iha loron 11 fulan julho tinan 2018.
Iha reunião ne’e, Presidente CI lori naran CI tomak hato’o felicitação ba Presidente do Parlamento Nacional ne’ebé eleito iha V Legislatura ne’e.
Além de ne’e, Presidente CI informa ba Presidente do Parlamento Nacional kona-ba serviço CI nian durante tinan rua nia laran ho desafio ne’ebé CI enfrenta, principalmente desafio iha quadro legal ba lei própria ba rádio no televisão (Undang-undang penyiaran) ne’ebé to’o agora seidauk iha, tanba ne’e, hussu ba Parlamento Nacional bele ko’alia ho Governo atu elabora lei ne’e hodi nune’e bele regulariza estatuto media público sira no ajuda serviço Conselho de Imprensa iha futuro.
Iha oportunidade ne’e, Presidente CI convida mós Presidente do Parlamento Nacional hodi participa iha conferência CI nian, ne’ebé sei realiza iha loron 19-20 fulan julho tinan ida-ne’e ho tema «Díli Diálogo Fórum 2018».
Presidente do Parlamento Nacional simu preocupação hotu hussi CI no sugere mós atu CI coordena ho Secretaria de Estado da Comunicação Social, hodi haree lei ba rádio no televisão nune’e Parlamento bele halo aprovação no regulariza iha futuro mai. Parlamento Nacional continua fó confiança hodi CI ho media comunicação sira bele halo serviço di’ak liu tan nune’e bele transmite informação sira ho qualidade ba público.
Iha loron hanessan, Presidente do Parlamento Nacional, Arão Noé de Jesus da Casta Amaral, mós halo reunião ho Embaixadora da Nova Zelândia, Vicki Poole, ho nia equipa, iha gabinete presidente nian.
Iha reunião ne’e Embaixadora da Nova Zelândia congratula Presidente do Parlamento Nacional ba cargo foun iha legislatura ida-ne’e.
Embaixadora da Nova Zelândia manifesta ona satisfação ho democracia no estabilidade ne’ebé la’o iha Timor-Leste, liuliu ho número feto ne’ebé aas iha Parlamento Nacional ba Legislatura ida ne’e, no espera katak Timor-Leste bele sai nafatin exemplo di’ak ba iha nação seluk.
Além ne’e, ko’alia mós kona-ba continuação ba cooperação bilateral entre nação Timor-Leste ho Nova Zelândia iha nível parlamentar, liu hussi Grupo Amizade Parlamentar, iha área Anticorrupção ho Igualdade de Género.
Presidente do Parlamento Nacional agradece ba apoio tomak hussi Nova Zelândia nian, principalmente apoio hussi força Nova Zelândia nian iha manutenção ba paz no continua too agora ba forças armadas Timor-Leste nian, bolsas de estudo no seluk tan.
