Parlamento Nacional, liu hussi Secretariado-Geral, iha loron 2 fulan julho tinan 2018, organiza funcionário tomak Parlamento Nacional nian hodi halo eleição ba nia representante iha Conselho de Administração Parlamento Nacional.
Nune’e hussi funcionário hamutuk na’in 147 ne’e hamossu pacote haat (4), hanessan: Pacote A: Jorge Paiva de Araujo (efetivo) no Agus dos Santos (suplente), pacote B: Lízia C.M.F de Araújo (efetivo) no Vitorino Borges de Deus (suplente), pacote C: Júlio Pires (efetivo) no Maria José Menezes (suplente), no Pacote D: Agus dos Santos (efetivo) no Justina Aníbal Pinto (suplente). Hussi pacote haat ne’e ida-idak hato’o nia programa liu hussi campanha ba funcionário sira antes realiza eleição.
Secretário-Geral do Parlamento Nacional, iha abertura ba eleição ne’e hatete entre pacote haat ne’e hotu-hotu representa funcionário no iha qualidade ne’ebé hanessan, nune’e bainhira pacote ida mak hetan confiança barak liu sei representa funcionário hotu nia direito iha Conselho de Administração.
Mas que nune’e eleição ne’ebé hala’o iha parte dadeer considera inválido tanba mossu falhanço técnico nune’e eleição refere hala’o ba iha 15h00 lokraik.
Resultado hussi eleição ne’e pacote A sai hanessan vencedor ho nia resultado voto hamutuk 59, pacote B ho voto hamutuk 44, pacote C ho nia voto hamutuk 6, no pacote D hamutuk 24.
Ho resultado ne’e, Secretário-Geral do Parlamento Nacional anuncia oficial katak pacote A ne’ebé representa hussi Jorge Paiva de Araujo (efetivo) no Agus dos Santos (suplente), sei hala’o nia knaar durante mandato V Legislatura ba período 2018-2023, iha Conselho de Administração.
