Presidente do Parlamento Nacional, Arão Noé de Jesus da Costa Amaral, acompanha ho nia assessor sira, Bruno Lencastre no Júlio Tomás Pinto, halo reunião ho Embaixador da Austrália iha Timor-Leste, Peter Roberts, ho nia equipa sira, iha gabinete do Presidente do Parlamento Nacional, iha loron 27 fulan junho tinan 2018.
Iha reunião ne’e, ko’alia kona-ba fortalecimento cooperação bilateral entre Parlamento Nacional no Parlamento Austrália nian, liuliu iha área lian povo no Grupo Mulheres do Parlamento Nacional, ne’ebé Parlamento Nacional prevê iha Plano Estratégico do Parlamento Nacional ba Período 2017-2022. Nune’e mós, assunto Delimitação Fronteira Marítima entre Governo Austrália ho Timor-Leste, liuliu ratificação tratado fronteira marítima, inclui visita membro Parlamento Austrália mai Parlamento Nacional iha fulan setembro ka outubro tinan ida-ne’e.
Presidente do Parlamento Nacional aprecia esforço no apoio tomak hussi Governo Austrália nian durante ne’e hodi halo desenvolvimento nacional, no hussu atu continua apoio iha futuro mai.
Iha loron hanessan, Presidente do Parlamento Nacional mós halo reunião ho Provedor dos Direitos Humanos e Justiça (PDHJ), Silvério Pinto Baptista, ho nia adjunto na’in rua, iha gabinete do Presidente do Parlamento Nacional nian.
Iha reunião ne’e, Provedor relata relatório atividade PDHJ tinan 2017 nian ba Presidente do Parlamento Nacional, ne’ebé baseia ba Estatuto PDHJ, artigo 45º, ne’ebé hatete PDHJ tinan-tinan, iha loron 30 fulan junho, precisa apresenta relatório atividade sira nian ba Parlamento Nacional.
Presidente do Parlamento Nacional aprecia ho serviço PDHJ nian durante ne’e, liuliu iha capacitação ba entidade Estado sira, hanessan Polícia no Militar, kona-ba Direitos Humanos e Justiça, no relatório ne’e rassik sei apresenta ba líder bancada sira, no sei fixa data ba apresentação Relatório ne’e iha Sessão Plenária.
