Parlamento Nacional iha loron 14 fulan junho tinan 2018, liu hussi eleição completa ona estrutura Mesa ba V Legislatura nian ba período 2018 too 2023.
Liu hussi Sessão Plenária, apresenta lista única ba cargo Vice-Presidente sira, Secretário, no Vice-Secretário sira. Lista ne’ebé apresenta mak hanessan; 1ª Vice-Presidente: Deputada Maria Angelina Lopes Sarmento, hussi PLP, 2ª Vice-Presidente: Deputado Luís Roberto da Silva, hussi KHUNTO; Secretária da Mesa: Deputada Maria Teresinha Viegas, hussi CNRT; 1ª Vice-Secretária; Deputada Isabel Maria Barreto Ximenes, hussi FDD; no 2ª Vice-Secretária: Deputada Regina Freitas, hussi PLP.
Iha intervenção Deputado sira-nian ne’ebé questiona kona-ba Proporcionalidade hussi lista ne’ebé apresenta, ne’ebé tenta atu hetan consensos entre partido sira, nune’e Presidente do Parlamento Nacional interrompe Sessão Plenária hodi fó tempo minuto 30 ba partido sira masque nune’e la hetan alteração ruma ne’ebé ikusmai avança ba votação ba lista original ne’ebé apresenta.
Deputado sira hussi FRETILIN ho PD decide retira hussi sala Plenário hodi la participa iha processo votação.
Nune’e liu hussi votação secreto consegue hili lista única ne’e ho unanimidade, 36 a favor, 0 contra no 0 abstenções.
Hafoin eleição, membro da Mesa sira tuur kedas iha ida-idak nia fatin iha Mesa Parlamento Nacional.
Antes remata Sessão Plenária ne’e, Presidente do Parlamento Nacional, Arão Noé de Jesus da Costa Amaral, hussu ba bancada parlamentar sira atu apresenta estrutura bancada ida idak nian ba Mesa Parlamento Nacional.
Iha loron 18 fulan junho sei halo reunião representante bancada sira hodi define agenda ba Sessão Plenária nune’e mós Comissão Especializada Permanente sira.
