Pagina Inicial»Noticia
Parlamento Nacional realiza ona reunião Plenária dahuluk ba V Legislatura nian iha loron 13 fulan junho tinan 2018, iha 10h00 dadeer, ne’ebé lidera hussi Presidente do Parlamento Nacional em exercício, Aniceto Longuinhos Guterres Lopes.
Iha inicio discurso Presidente em exercício nian manifesta processo politico tomak ne’ebé lao ho pacifica iha fulan hirak ba kotuk nune’e mós cumprimenta Deputado foun sira ne’ebé atu simu posse iha Legislatura ida-ne’e, no hussu atu Legislatura foun ne’e oinsá bele reforça interesse nacional.
Agenda tuir iha Plenária extraordinária ne’e apresenta Projeto de Deliberação hodi forma Comissão Eventual para Verificação de Poderes dos deputados, ho nia composição sira, ne’ebé iha interrupção ba reunião Plenária hodi ajusta buat balun ne’ebé Deputado sira sugere. Projeto de Deliberação ne’e ikusmai hetan aprovação ho votos 60 a favor, 0 contra no 5 abstenções. Nune’e Comissão ida-ne’e ho nia membro Deputado na’in 9 hussi coligação AMP, na’in 5 hussi FRETILIN, na’in 2 hussi PD no na’in 1 hussi FDD.
Comissão ne’e reunião hodi confirma legalidade, ausência de incompatibilidades, no renúncia hodi halo substituição sira, nune’e Plenária halo votação ba Relatório Comissão ne’e ho votos 38 a favor, 0 contra no 27 abstenções.
Liu tiha processo ne’e hotu continua kedas ho juramento Deputado sira ba V Legislatura nian.
Reunião Plenária contínua ho anúncio lista única ba cargo Presidente do Parlamento Nacional.
Hussi lista única ba candidato Presidente do Parlamento Nacional mak Deputado Arão Noé de Jesus da Costa Amaral, hussi partido CNRT.
Ho ida-ne’e liu hussi eleição candidato ne’e hetan votos 36 a favor, 29 contra no 0 abstenções.
Presidente do Parlamento Nacional, Arão Noé de Jesus da Costa Amaral, iha nia discurso, hatete sei representa Deputado hotu hodi cumpri dever sira mesmo iha divergências politico partidário maibé tau interesse nacional iha leten.
Aprecia maturidade política povo tomak nian iha processo eleição parlamentar. No sei tau importância no matem programa de cooperação ho instituição oioin hanessan relações bilateral ho Assembleia da República de Portugal inclui instituição sira seluk hodi apoio desenvolvimento Parlamento Nacional nian.
Iha período ida-ne’e importante tebes ba aprovação do Orçamento Geral do Estado no lei importante sira seluk hodi garante processo sira no desenvolvimento nacional.
Iha discurso ikus nian, Presidente do Parlamento Nacional, apresenta nia agradecimento ba Presidente do Parlamento Nacional cessante, Mesa, no Deputado sira, Primeiro-Ministro no membro do Governo sira, Policia, F-FDTL, no liderança AMP ne’ebé fó confiança ba nia.
Iha evento ne’e parte Secretariado Geral do Parlamento Nacional, distribui mós documento essencial sira hanessan Constituição RDTL, Regimento do Parlamento Nacional, Manual dos Deputados, ba Deputado foun sira.
Sessão Plenária sei continua iha loron 14 fulan junho tinan 2018, hodi halo eleição ba membro Mesa sira.
