Presidente do Parlamento Nacional, Aniceto Longuinhos Guterres Lopes, acompanha ho nia vice-Presidente sira, Júlio Sarmento da Costa “Meta Malik” no António Verdial de Sousa, halo reunião ho Presidente do Conselho de Imprensa, Virgílio da Silva Guterres, no ho nia equipa, iha Gabinete Presidente nian, iha loron 5 fulan dezembro tinan 2017.
Iha reunião ne’e, Presidente do Conselho de Imprensa informa kona ba preocupação balun relaciona ho Lei da Comunicação Social, ne’ebé iha nia implementação, dificulta atividade Conselho de Imprensa nian, liuliu desenvolvimento companhia comunicação social sira nian no liberdade imprensa ninian. Além de ne’e, precisa iha lei ida ba estabelecimento rádio no televisão, infraestrutura ba media no capacitação jornalista sira nian.
Presidente do Conselho de Imprensa hatutan, horas ne’e daudaun Conselho de Imprensa prepara ona Carteira Profissional ba jornalista sira ne’ebé hala’o ona função jornalismo liu tinan lima, ne’ebé primeira fase nian sei distribui iha fulan dezembro nia laran.
Presidente do Parlamento Nacional, Aniceto Longuinhos Guterres Lopes, hateten papel media nian importante tebes iha processo desenvolvimento nacional liuliu iha ambiente democracia nian. Tan ne’e precisa iha lei própria no condição ne’ebé di’ak ba media sira hodi hala’o nia função ho di’ak.
