Presidente Parlamento Nacional, Aniceto Longuinhos Guterres Lopes, halo conferência de imprensa iha sala conferências Parlamento Nacional iha loron 11 fulan dezembro tinan 2017, relaciona ho carta destituição ba Presidente Parlamento Nacional, ne’ebé apresenta hussi partido oposição iha Parlamento Nacional.
Durante conferência de imprensa, Presidente Parlamento Nacional informa processo tomak hahú hussi Orçamento Retificativo too pedido Destituição ba Presidente Parlamento Nacional rassik ho nia resumo hanessan tuir mai ne’e:
“Público tomak hatene ona, katak Partido oposição tolu iha Parlamento Nacional halo Aliança Maioria Parlamentar (AMP) ho objetivo firme, mak hadau ukun hussi coligação FRETILIN – PD ne’ebe forma Governo Minoritário. Tanba ne’e maka hafoin forma tiha, AMP usa dalan oioin, ka halo maneira hotu-hotu atu hamonu VII Governo Constitucional (Governo), hahú kedas halo pressão ba Presidente da Republica, rejeita programa Governo, tenta atu bloqueia Orçamento Certificativo (OR), halo Moção Censura ba Governo, no seluk tan.
Ha’u hatene loloos, katak ha’u nia destituição ne’e tama tiha ona iha agenda maioria oposição nian hori uluk kedas iha momento eleição ba Presidente Parlamento Nacional (PPN), nu’udar parte hussi estratégia atu hatún Governo.
Nune’e, mak iha dia 1 de dezembro 2017, loro kraik tuku 5 liu minuto 58, hatama ona mós Proposta atu Hatún PPN, proposta ne’ebé assina hussi grupo Deputado na’in 12 hussi oposição AMP nian. Hare hussi rasão sira ne’ebe sira apresenta, ita hatene kedas motivo hussi proposta ida-ne’e, katak AMP hakarak hatuur PPN ida-ne’ebe bele facilita hamonu lalais Governo, liu hussi agendamento ho urgência Moção Censura ba Governo.
Durante fulan tolu ha’u assumi função nu’udar PPN, ha’u hassoru oposição ida-ne’ebé abusa liu ninia maioria iha PN, ne’ebé usa dalan hotu-hotu atu atingi sira nia objetivo politico, hamonu lalais Governo, la interesse sá custo mak nação ne’e sei selu iha tempo oin mai. Buat ne’ebé sala sira dehan loos, buat ne’ebe ema dehan los, dehan fali sala. La viola regimento dehan fali viola, enquanto viola regimento, sira dehan lae, tuir de’it sira nia interesse.
Ha’u halo ona buat hotu ho consciência mós, katak ha’u la viola regimento, nem contra prática normal ka precedente ruma iha PN, muito menos viola Constituição hanessan sira alega mai ha’u publicamente. Ha’u nia “sala ka pecado mortal” mak tan de’it ha’u pertence ba partido ida ne’ebé brani atu simu netik desafio hodi avança ho Governo minoritário, atu fó oportunidade ida atu haboot experiencia democrática ba nação ida-ne’e.
Nu’udar PPN, segunda figura Estado nian, ha’u iha dever tomak atu haree ba RPN, pratica normal ka precedente iha PN no cultura vida institucional Estado, no liuliu tem que halo mós ponderação ba interesse nacional ne’ebé sai causa, ho nia eventuais custos politico, social, no económico ba país, wainhira halo decisão atu halo agendamento ba Recurso Admissão Proposta Lei OR no Moção Censura ba Governo.
Tuir loloos, maioria oposição KHUNTO-PLP-CNRT nian iha de’it razão única hatama proposta atu hatún ha’u. Razão ne’e, mak hakarak halo agendamento lalais ba Moção Censura ba Governo. La iha razão seluk, maibé sira obriga an hodi hatama tan razão sira seluk atu halo acusação oioin mai ha’u, hodi hatete buat messak la loos no inventa tan.
Acusação hirak ne’e la’ós de’it atingi gratuitamente ha’u nia integridade moral, honra no reputação, maibé Deputado proponente sira rassik hatudu sira nia intensão aat, tanba mai ho razão infantil, argumenta la ho laran-moos (desonesto), halo conclusão irrealista, la baseia ba factos!
Forma sira hanessan ne’e la dignifica politica, la dignifica mós Estado no estraga imagem próprio Parlamento Nacional nian.
Nu’udar cidadão, nune’e mós nu’udar PPN, ha’u sei hatán liu hussi dalan Justiça nian ba acusação hirak ne’e hotu, no ohin dadeer ha’u hatama ona ha’u nia processo iha Tribunal.
Ha’u eleito ba cargo PPN liu hussi dalan democrático iha dia 5 de setembro 2017, nune’e ha’u sei nafatin Presidente Parlamento Nacional to’o decisão Tribunal ruma ne’ebé rejeita ha’u nia pedido, ka wainhira iha ona destituição definitivo.”
