Prezidente Parlamentu Nasionál, Maria Fernanda Lay, akompaña husi Sekretaria Meza, Deputada Virginia Ana Belo no Asesor, simu vizita kortezia husi Embaixador Angola nian iha Timor-Leste, José Andrade de Lemos, iha loron 12 fulan marsu tinan 2025, iha Sala Konferénsia Parlamentu Nasionál.
Vizita ne’e ho objetivu atu aprezenta saudasaun hanesan Embaixadór foun ne’ebé akreditadu ba Timor-Leste no hodi ko’alia mos kona-ba asuntu balun, hanesan reforsu kooperasaun bilaterál entre parte rua ne’e iha futuru iha área interparlamentár no mós, espesifikamente, iha área sira serbisu CPLP (Comunidade Países da Língua Portuguesa) nian.
Prezidente, hodi Parlamentu Nasionál nia naran, hato’o nia agradesimentu ba vizita ne’e no hein katak, ho ezisténsia Embaixada Angola nian iha Timor-Leste, sei fasilita kooperasaun iha futuru, iha área importante oioin, inklui kona-ba vistu sira, hodi fasilita vizita timoroan sira nian ba Angola. Nia fó hanoin mós katak, istórikamente, Timor-Leste ho Angola hanesan maun-alin di’ak.
Ikus husi vizita ne’e, parte rua troka prenda ba malu nudar jestu amijade metin entre nasaun rua nian.
Depois de reuniaun ida ne’e, iha loron no fatin hanesan, Prezidente Parlamentu Nasionál akompaña husi Sekretaria Meza, Deputada Virginia Ana Belo, no Prezidente Komisaun B, ne’ebe trata asuntu Negosiu Estranjeiru, Defeza no Seguransa Nasionál nian, Deputado Domingos Augusto “DEKER”, simu audiénsia husi Embaixador Malasia nian iha Timor-Leste, Dato Amarjit Sarjit Singh.
Iha enkontru ne’e, koalia kona-ba hametin lasu amizade iha nível parlamentar nian, liu husi grupo amizade entre parlamentu rua nian. Além de ne’e, koalia mos konaba apoiu Malásia nian mai Timor-Leste ba adezaun ASEAN nian, ne’ebe sei hare liu ba área fornesimentu formasaun profisionál ba tekniku MNEK (Ministeriu Negosiu Estranjeiru no Kooperasaun), no ministériu relevante sira, no mós kona-ba vizita Vise-Prezidente Parlamentu Malásia nian mai Parlamentu Nasionál iha fulan juñu.
Iha okaziaun ida ne’e, Prezidente aproveita oportunidade hodi hato’o agradesimentu ba Parlamentu Malasia nia apoiu total ba Timor-Leste nia adesaun ba ASEAN, wainhira iha eventu Konferensia Internasional AIPA (Asean Inter-Parlamentar Assembly) nian iha LAOS LDR. Prezidente husu atu Deputadu sira no tékniku sira husi Parlamentu Nasionál inklui iha formasaun profisionál ne’ebé sei organiza, nune’e ajuda sira atu dezenvolve sira-nia koñesimentu kona-ba lejislasaun relasiona ho adezaun ba ASEAN. Ikus liu, kona-ba vizita Vise-Prezidente Parlamentu Malázia nian, nia hateten katak Parlamentu Nasionál sei halo koordenasaun ho Embaixada Malázia iha Timor-Leste hodi prepara didi’ak ba vizita ne’e. FIM
