Parlamentu Nasionál liu husi reuniaun plenária ordinária, iha loron 11 fulan março tinan 2025, realiza diskusaun ho aprovasaun iha jeneralidade ba Proposta lei nú. 14/VI(2.ª) – Enkuadramentu Orsamentu Jeral Estadu no Jestaun Finanseira Públika, aprova ho votus 36 a favor, 1 kontra no 15 abstensaun. Depois de aprovasaun iha jeneralidade, Plenáriu kontinua halo votasaun ba autorizasaun ba diskusaun espesialidade iha komisaun, ho votus 36 a favor, 12 kontra no 4 abstensaun.
Proposta Lei ida-ne’e hakarak estabelese enkuadramentu ba orsamentu jerál estadu nian, konta jerál estadu nian, no orsamentu no konta sira hosi subsetór sira ne’ebé entegra, inklui sira-nia preparasaun, aprovasaun, ezekusaun no relatóriu, rejime finanseiru husi servisu no entidade sira husi setór públiku administrativu no rejime sira husi jestaun finanseira públika, responsabilidade no kontrolu orsamentál.
Iha aprezentasaun Ministra Finansas nian, hatete, kuadru legal ne’ebé vigora, iha problema estruturais ne’ebé difikulta entermus planeamentu, orsamentasaun, exekusaun orsamental, no difikulta mos eskrutiñu iha avalisaun implementasaun orsamentu ne’e rasik. Objetivu husi aprovasaun lei foun ne’e maka, simplifika regra sira kona-ba prosesu orsamental no kuadru legal ne’ebé vigora atu fasilita implementasaun husi entidade sira hotu.
Antes diskusaun no aprovasaun ba lei refere, iha intervensaun diversas, Deputadu sira aprezenta preokupasaun ba problema sosial sira no infraestrutura bazika ne’ebé populasaun enfrenta, hanesan, estrada, poste, edukasaun, saúde, manutensaun ró Berlin Nakroman no kestaun importante sira seluk ne’ebé precisa atensaun husi Governu no Insituisaun relevenate sira.
Sesaun Plenária ne’e, prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Ministra Finansas, Santina José Rodrigues F. Viegas Cardoso; Vice-Ministra das Finanças, Felícia Claudinanda Cruz Carvalho no Vise-Ministru ba Asuntu Parlamentar, Aderito Hugo da Costa. FIM
