Parlamentu Nasionál liu husi reuniaun plenária ordinária, iha loron 10 fulan marsu tinan 2025, realiza diskusaun ho aprovasaun ba Projetu Rezolusaun nú 54/VI(2.ª) – Kria Komisaun Eventual ba Akompañamentu Konflitu Sahara Osidental nian, ho votus 54 a favor, 0 kontra no 0 abstensaun.
Komisaun eventual ne’e kompostu husi Deputadu na’in ualu, ne’ebé indijita husi Bankada Parlamentár sira, mak hanesan: CNRT Deputadu na’in tolu, FRETILIN Deputadu na’in rua, PD Deputadu ida, KHUNTU Deputadu na’in ida no PLP Deputadu na’in ida.
Komisaun ne’e sei funsiona durante periodu lejislatura nia laran no sei disolve iha nia rohan ka iha loron ne’ebé konflitu Sahara Osidentál rezolve, karik ida-ne’e akontese molok lejislatura nia rohan.
Iha okaziaun ne’e, Bankada Parlamentar FRETILIN, hato’o deklarasaun politika kona-ba problema fronteira terrestre entre Timor-Leste ho Indonésia. Alénde ne’e, iha intervensaun diversas, Deputadu sira aprezenta preokupasaun ba problema iha setor sira hanesan infraestrutura bazika, edukasaun, saúde, no lixu iha Díli laran, prosesu pagamentu ba subsídio idosos, no kestaun importante sira seluk ne’ebé precisa atensaun husi Governu no Insituisaun relevenate sira.
Iha sesaun plenária ne’e, Meza anúnsiu reabertura, to’o loron 24 fulan marsu tinan 2025, prazu ba aprezentasaun kandidatura ba eleisaun membru nain rua ba Konsellu Imprensa nian.
Sesaun Plenária ne’ebé hahú ho exekusaun Hino Nasionál no Minutu ida hakmatek, prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Vise-Ministru ba Asuntu Parlamentar, Aderito Hugo da Costa. FIM
