Prezidente Parlamentu Nasionál, Maria Fernanda Lay akompaña husi Sekretaria Meza, Virgínia Ana Belo, prezide abertura ba serimónia toma posse dahuluk Estrutura Asosiasaun das Mulheres Ex-Parlamentares de Timor-Leste (AMEPTL), ho tema “ Servi com Dedicação e Abnegação” ne’ebe mak realiza iha loron 27 fulan fevereiru tinan 2025, iha Sala Auditoriu Apuramentu CNE-Díli.
Iha diskursu abertura Prezidente nian hatete, eventu ne’e marka tan pasu importante ida, laos deit sai hanesan feto ne’ebe maka servi no didika ona nia servisu iha Parlamentu Nasionál maibe sira mos hakarak konsolida no hametin liu tan prinsipiu igualdade jeneru ne’ebe maka konsagra iha artigu 17.o Kontituisaun Repúblika Timor-Leste nian.
Prezidente manifesta laran haksolok ba establesimentu Asosiasaun ida ne’ebe mai ho nia papel fundamental sira atu kontribui ba konstrusaun Estadu Direito ida ne’e, hahu husi membru Feto Assembleia Konstituinte to’o iha Eis-Deputada V Lejislatura sira, liu husi sira nia esperénsia, dejafiu no vitória sira hotu nebe maka sira iha sei vale ba ita nasaun no sei sai hanesan historia polítika Timor-Leste nian. Deseju mós susesu ba asosiasaun ne’e iha futuru.
Iha fatin hanesan, Prezidente Ad hoc Asosiasaun, Judite Dias Ximenes, hatete mos katak Asosiasaun ne’e hari’i ho objetivu atu habelar no hametin liu tan demokrasia no afirma Feto nia partisipasaun iha vida politika tuir Konstituisaun Republika Timor-Leste nian, laos sai hanesan valor deit maibe atu kontribui ba konstrusaun iha sosiedade no Estadu ida ne’e.
Iha oportunidade ida ne’e, Prezidente mos fo nia kontribuisaun ideia ba hadiak Estatu no Rejimentu Asosiasaun nian.
Konvidadu sira ne’ebé partisipa iha serimónia ne’e maka, Sekretária Estadu Igualdade, Elvina Sousa Carvalho, Adjunta Provedoria Direitu Humanu no Justisa, Maria Marilia X.C.de O. da Costa, Eis-Sekretaria Estadu ba Asuntu Igualdade Jeneru sira, Embaixadora Cuba iha Timor-Leste, Grisel Alina Aldama Innis, Prezidente Rede Feto, Zelia Fernandes, Reprezentante Sosiedade Civil sira no Feto Partidu Politika sira. FIM
