Prezidente Parlamentu Nasionál, Maria Fernanda Lay, akompaña husi Prezidente Komisaun F ne’ebe trata asuntu, Saude, Seguransa Sosial no Igualdade Jeneru, Maria Gorumali Barreto, Prezidente Komisaun G, ne’ebe trata Asuntu Edukasaun, Juventude, Kultura no Sidadania, Armando dos Santos Lopes, no Prezidente Komisaun A, ne’ebe trata asuntu Konstitusional no Justisa, Patrocino dos Reis Fernandes, simu audiénsia husi Prezidente Institutu Defeza ba Direitu Labarik (INDDICA), Dinorah Granadeiru, akompaña husi Reprezentante UNICEF iha Timor-Leste ho nia ekipa sira, iha loron 24 fulan fevereiru tinan 2025, iha Sala Konferénsia Parlamentu Nasionál.
Reuniaun ne’e ho objetivu, atu fo informasaun (breafing) ba Prezidente Parlamentu Nasionál no Prezidente Komisaun relevante sira, kona-ba asuntu protesaun ba labarik sira iha Timor-Leste, nune’e Deputadu sira bele hetan koñesimentu diak wainhira halo reuniaun ho Reprezentante Espesial Sekretariu-Jeral Organizasaun Nações Unidas (ONU) ba asuntu hapara violésia ba labarik sira iha Timor-Leste, iha loron 1 to’o 6 fulan marsu tinan 2025.
Iha audiénsia ne’e ko’alia mós kona-ba ajenda ba lansamentu kompromisu sanulu ne’ebé Estadu Timor-Leste presiza implementa liu husi ministériu relevante sira atu nune’e bele alkansa iha prazu ne’ebé determina ona, liu-liu iha tinan 2 oin mai. Prezidente INDDICA mos informa katak komitmentu sira ne’e hetan ona aprezentaun iha konferénsia Bogotá.
Iha sorumutu ne’e, Prezidente Parlamentu Nasionál hateten preokupa tebes ho problema sira ne’ebé relasiona ho protesaun no direitu ba labarik sira nian iha Timor-Leste, no tanba ne’e husu atu kompromisu sira ne’e reflete situasaun reál iha Timor-Leste, liuliu kona-ba kultura hanorin valór Timor nian ba labarik sira, tanba edukasaun iha família laran ne’e importante tebes. Prezidente mós mensiona kestaun sira kona-ba violénsia doméstika no abuzu sira seluk hasoru labarik sira iha Timor-Leste. Nia salienta mós, di’ak liu promete buat ne’ebé ita bele alkansa duke iha mehi boot maibé depois nunka alkansa. Ikus Prezidente hatete katak, husi nia parte no ekipa sira sei tenta atu partisipa iha eventu ba vizita espesial ida ne’e. FIM
