Prezidente Parlamentu Nasionál (PPN), Maria Fernanda Lay, akompaña husi membru Meza no Reprezentante Prezidente Bankada sira simu audiénsia husi Reprezentante Vatikanu iha Timor-Leste, Monseñor Marco Sprizzi, iha loron 24 fulan fevereiru tinan 2025, iha Sala Konferénsia Parlamentu Nasionál.
Audiénsia ne’e ho objetivu atu sauda no agradese ba kolaborasaun, ho ita-nia Nasaun no ho Parlamentu Nasionál, husi Embaixadór Santa Sé durante nia mandatu tinan 6 iha ita-nia rain, inklui kona-ba asuntu sira hanesan vistu ba misionáriu katóliku sira iha Timór-Leste, dezenvolvimentu edukasaun, lansamentu livru kona-ba fraternidade umana, prevensaun ba Covid-19, no liu-liu, Santo Papa nia vizita mai Timor Leste. Monseñor Sprizzi halo ninia despedida ba Parlamentu Nasionál iha okaziaun ida-ne’e, tanba simu nomeasaun foun husi Santo Papa.
Embaixadór hato’o ninia kontente tanba Timor-Leste kontinua defende valór sira demokrasia, umanidade no respeitu ba diferensa relijioza no liberdade ema hotu-hotu nian no ikus liu dehan katak nia sei kontinua rai Timor-Leste iha nia fuan no orasaun.
Reprezentante sira husi Prezidente Bankada sira hato’o sira-nia agradesimentu wain ba servisu ne’ebé presta husi Monseñor Sprizzi durante tinan 6 ne’e, no, liuliu, tanba tulun ona hodi halo ema timoroan tomak nia mehi atu hetan vizita husi Amu-Papa Francisco sai realidade. Bankada sira mos kontinua husu Monseor nafatin tau Timor-Leste iha nia orasaun no fuan atu nune’e Timor-Leste kontinua buras no moris iha properu paz no justisa nia laran.
Ikus Prezidente Parlamentu lori povo Timor-Leste nia naran, hato’o agradese wain ba servisu Monseñor nian durante nia mandatu iha Timor-Leste, no entrega lembransa balun ne’ebé Parlamentu Nasionál oferese nudar simbolu domin Timoroan nian ba Santo Papa, Nia haktuir liu tan katak Timor-Leste kontinua reza atu Santo Papa bele rekupera lalais husi situasaun defisil ida ne’e, no dezeja susesu barak ba Monseñor iha misaun foun ne’e. FIM
