Parlamentu Nasionál, liu husi Komisaun E ne’ebe trata asuntu Infrastrutura, lidera husi Prezidente Komisaun E, Marcos Xavier, akompaña husi nia membru sira, finaliza ona diskusaun no votasaun iha espesialidade ba Proposta Lei Nú. 9 /VI(1a) - konaba Medidas Tutela Legalidade Urbanistika nian, ho parte Governu, ne’ebe lidera husi Ministru Obras Publika, Samuel Marçal no akompaña husi Ministru no Sekretariu Estadu relevante sira inklui Prezidente Autoridade Munisipal 13 (sanulu resin tolu), iha loron 19 to’o 20 fulan fevereiru tinan 2025, iha Salaun enkontru IADE, Liquiçá.
Lei ne’e ho natureza importante ne’ebe mai ho nia objetivu atu halo kompleta ezekusaun ba Dekretu Lei Nu. 9/2022 loron 24 fulan fevereiru, kona-ba Estabelese Rejime Juridiku Edifíkasaun no Urbanizasaun nian, espesialmente foka liu ba atu regula konstrusaun urbanu (sidade) iha teritoriu nasionál Timor-Leste nian.
Debate ne’e, hetan mos prezensa husi Prezidente Parlamentu Nasionál, Maria Fernanda Lay inklui membru Komisaun A ne’ebe trata asuntu Konstitusional no Justisa ho objetivu atu hola parte iha diskusaun no kontribui opiniaun sira liga ba asuntu ne’e. Nune’e diskusaun ba lei refere, interativu tebes no kritiku tanto husi bankada Governo no opozisaun ho hanoin ida ba interese ema hotu nian. FIM
