Prezidente Parlamentu Nasionál, Maria Fernanda Lay, simu audiénsia husi AMEPTL (Associação de Mulheres Ex-Parlamentares de Timor-Leste), reprezenta husi portavoz, Judite Dias Ximenes ho nia ekipa sira, iha loron 18 fulan fevereiru tinan 2025, iha Gabinete Prezidente Parlamentu Nasionál.
Tuir portavoz husi Asosiasaun refere hatete, objetivu husi enkontru ne’e, mai kumprimenta no fo informasaun ba Prezidente Parlamentu kona-ba sira nia Misaun no Vizaun inklui konvida Prezidente Parlamentu atu prezide abertura no fo posse ba estrutura dahuluk ne’ebe maka sei realiza iha loron 27 fulan fevereiru tinan 2025, iha Salaun Larigutu CNE, Dili.
Alénde ne’e, portavoz ne’e mos haklean liu tan katak, Asosiasaun ne’e konsiste husi Eis-Deputadas Grupo Mulheres Parlamentares Timor-Leste nian, hahu husi Assembleia Konstituinte no sira nia servisu foka liu ba iha pilar haat (4) ne’ebé hakerek ona iha sira nia estatutu mak hanesan: Fortalesimentu Instituisaun, advokasia ho sidadaun sira kona-ba importánsia husi involvimentu feto iha vida polítika, formasaun liuhusi hakbiit feto hodi dezenvolve sira-nia kapasidade, no estabelese relasaun públika ho parseria sira, ne'ebé nia validasaun sei halo iha loron abertura nian. FIM
