Parlamentu Nasionál liu husi reuniaun plenaria ordinária, iha loron 17 fulan fevereiru tinan 2025, autoriza dezlokasaun ba vizita estadu Prezidente Repúblika nia ba Repúblika Sosialista Vietname, entre loron 24 to’o 27 fulan fevereiro tinan 2025, ho votus a favor 31, kontra 12 no abstensaun 5.
Deslokasaun oficial ida ne’e hanesan resposta ba convite husi Primeiru-Ministru Repúblika Sosialista Vietname nian, hodi partisipa iha Fórum Futuru Nasaun sira Sudeste Aziátiku nian ba daruak, ho tema Harii ASEAN ida ne'ebé unidu, inkluzivu no reziliente iha kontestu transformasaun globál sira.
Alénde ne’e, iha mós aprovasaun ba votu pezar ba falesimentu Harold Maria Meneses Moucho, ho votus a favor 52 kontra 0 no abstensaun 0.
Iha sesaun plenaria ne’e, Meza mós halo anúnsiu kona-ba relatoriu fiskalizasaun ba Instituisaun tutelada sira, husi Komisaun Edukasaun,Juventude, Kultura no Sidadania. Depois de ne’e, kontinua ho Bankada FRETILIN aprezenta deklarasaun politika kona-ba asaun eviksaun forsada husi Governu no Deputadu sira mos aprezenta kestaun seluk mak hanesan infraestrutura bázika, Edukasaun, Saúde, animal livre iha estrada, tinta passadeiras (zebracross) kuaze atu lakon no kestaun importante sira seluk ne’ebé presija atensaun husi Governu.
Reuniaun plenaria ne’e prezide husi Prezidente Parlamentu Nasionál, Maria Fernanda Lay, akompaña husi Membru Meza sira no hetan partisipasaun husi, Vise-Ministru ba Asuntu Parlamentar, Aderito Hugo da Costa. FIM
