Prezidente Parlamentu Nasionál (PPN), Maria Fernanda Lay, akompaña husi Vise-Prezidente, Alexandrino Afonso Nunes, Sekretária Meza, Bendita Moniz Magno, no Prezidente Komisaun D, ne’ebe trata asuntu Ekonomia no Dezenvolvimentu, Ricardo Batista simu iha audiénsia delegasaun evaluador Organizasaun Mundial Komersiu (OMK) nian, lidera husi Vise-Diretor-Jeneral Organizasaun nian, Xiangchen Zhang ho nia ekipa sira, iha loron 11 fulan fevereiru tinan 2025, iha Sala Konferénsia Parlamentu Nasionál nian.
Objetivu husi vizita ne’e atu delegasaun halo avaliasaun ba Timor-Leste nia progresu hafoin asinatura akordu adezaun ba OMK iha Abu Dhabi iha tinan 2024, partikularmente atu analiza sinerjia servisu entre orgaun soberanu sira no instituisaun relevante sira seluk iha preparasaun dokumentu sira ne’ebé responde ba Planu Dezenvolvimentu OMK nian. Aleinde ne'e, sira hakarak rona kona-ba oinsá Parlamentu Nasionál envolve iha asuntu ne'e. Delegasaun ne’e mós promete atu fó apoiu iha formasaun ba pesoál Rekursu Umanu sira kona-ba asuntu sira ne’ebé relasiona ho OMK nian.
Iha biban ne’e, Prezidente, lori Parlamentu Nasionál nia naran, hato’o agradesimentu wain ba vizita delegasaun OMK nian hodi ko’alia diretamente kona-ba asuntu importante ida ne’e. Prezidente Parlamentu afirma katak durante ne’e Parlamentu Nasionál serbisu maka’as hodi fó apoiu ba Governu iha área lejizlasaun atu nune’e bele aselera prosesu preparasaun, no Prezidente hein katak Deputadu sira mós bele iha oportunidade atu partisipa iha atividade formasaun ne’ebé relasiona ho OMK atu nune’e bele tulun Deputadu sira produz lejizlasaun ne’ebé iha relasaun ho kualidade kestaun ne’e. FIM
