Parlamentu Nasionál liu husi reuniaun plenária ordinária, iha loron 10 fulan fevereiru tinan 2025, Mesa anúnsiu abertura ba prosesu aprezentasaun kandidatura ba eleisaun husi Parlamentu Nasionál ba membru na’in rua ba Konsellu Imprensa (tuir informasaun nú. 1/2025/DIPLEN).
Relasiona ho anúnsiu ne’e, Mesa informa katak eleisaun sei realiza iha reuniaun plenária, loron 24 fulan fevereiru tinan 2025, husu Deputadu sira liu-liu bankada Parlamentar sira atu aprezenta kandidatura.
Iha okaziaun ne’e, Bankada Parlamentar FRETILIN, hato’o deklarasaun politika hodi bolu atensaun ba nesesidade ba asaun salva servisu saude iha Timor-Leste. Iha intervensaun diversas, Deputadu sira aprezenta preokupasaun ba problema sira hanesan eletrisidade mate-lakan bebeik iha teritoriu nasionál. Falta kuartu ba idosos abandonado iha Hera. Estrada Diresaun Bobonaro husi ponte Nunura ba Maliana vila la-diak. fatuk sira iha estrada husi Liquiçá ba Loes ne’ebé halo susar atu la’o bá-mai; estrada iha Lautém ne’ebé kompañia ida hetan kontratu ba tinan barak maibé abandona obra ne’e molok remata nesesidade ba fasilidade adekuadu sira atu akomoda ema sira ho defisiénsia mentál; atuasaun polisia nian hasoru joven ida iha estrada iha municipiu viqueque. Meskadu Taibessi desorganizadu. Tinta passadeiras kuaze atu lakon no mos nia kolokasaun iha fatin risku kurva sira, no kestaun importante sira seluk ne’ebé precisa atensaun husi Governu no insituisaun relevenate sira.
Iha okaziaun ida ne’e, Deputadu sira mos hato’o parabéns ba boxista timor-oan nain rua ne’ebé hatudu sira nia talentu ho profisionál tebes hodi hamorin Nasaun Timor-Leste nia naran iha internasional.
Sesaun Plenária ne’e, prezide husi Prezidente Parlamentu Nasionál exersisiu, Maria Terezinha da Silva Viegas, akompaña husi membru Meza sira no hetan prezensa husi Vise-Ministru ba Asuntu Parlamentar, Aderito Hugo da Costa. FIM
