Prezidente Parlamentu Nasionál, Maria Fernanda Lay, akompaña husi Deputadu sira, Sekretariu Jeral Parlamentu Nasionál, Edgar Sequeira Martins no funsionariu Parlamentu Nasional sira, simu delegasaun Internasional Corrida da Paz husi Sri Chinmoy Oneness-Home (Unidade mai husi Uma), lidera husi Diretor Executivu Sri Chinmoy, Salil Wilson hodi selebra hamutuk loron Corrida da Paz (Halai Dame nian) ne’ebe mak organiza husi Ministeriu Edukasaun, lidera husi Ministra Edukasaun, Dulce de Jesus Soares ho nia komitiva sira, iha loron 4 fulan fevereiru tinan 2025, iha resintu Parlamentu Nasionál.
Iha biban ne’e, Prezidente Parlamentu Nasionál mós hato’o nia diskursu no hateten: “Iha mundu ohin loron, iha ne’ebé violénsia uza hodi rezolve ideia oioin, ideia dame nian, nesesidade ba dame, forsa dame nian, no dalan ba ita hotu atu hetan defeza, no Korrida ba Dame hanesan resposta ida ba violénsia. Sri Chinmoy hanorin katak Dame la'ós auzénsia funu nian. Ne'e maka prezensa dinámiku komprensaun, domin no armonia nian.”
Serimonia ne’e hetan mos prejensa husi membru Governu sira, Vise- Primeiru-Ministru, Francisco Kalbuadi Lay, Reprezenta Primeiru-Ministru, Vise-Primeiru-Ministru, Mariano Asanami Sabinu, Representante Governu relevante seluk, Estudante, Manorin nain sira, Diretur sira, Funsioariu sira husi ministériu ka intituisaun relavante sira.
Tuir ajenda, serimonia ne’e sei kontinua ho Marsa Corrida da Paz 5 Km iha loron 7 fulan fevereiru ne’ebe maka sei akontese iha área Sentru Dili nian. FIM
