Parlamentu Nasionál liu husi reuniaun plenária ordinária, iha loron 3 fulan fevereiru tinan 2025, realiza diskusaun ho aprovasaun iha jeneralidade ba Proposta lei n.º 9/VI(1.ª) – Medidas Tutela ba Legalidade Urbaniístika, aprova ho votus 39 a favor, 0 kontra no 19 abstensaun. Depois de aprovasaun iha jeneralidade, Plenáriu kontinua halo votasaun ba autorizasaun ba diskusaun espesialidade iha komisaun, ho votus 38 a favor, 11 kontra no 8 abstensaun.
Iha Proposta Lei ne’e estabelese medida sira tutela ba legalidade urbana, ho objetivu atu regula aktu administrativu sira ne’ebé nesesáriu hodi garante kumprimentu ba lejizlasaun relasiona ho lisensiamentu ba operasaun urbanistika no edifikasaun, no mós kumprimentu ba instrumentu jestaun territoriál sira.
Iha okaziaun ne’e, Bankada Parlamentar KHUNTO, hato’o deklarasaun politika ho objetivu hodi fohanoin Governu Konstitusionál atu rona no tau matan ba exijensia husi esperansa sosiedade Timor-Leste nian, no Bankada FRETILIN koalia kona-ba dezenvolvimentu infraestrutura bázika ligadu ho implementasaun husi programa IX Governu Konstituisaun.
Iha intervensaun diversas, Deputadu sira aprezenta preokupasaun ba problema iha setor sira hanesan infraestrutura bazika, edukasaun, saúde, no kestaun seluk hanesan lixu iha Díli laran, lista veteranus 2009, kontrusaun ba edifisiu eskuadra PNTL Posto Cristo Rei nian, sistema SERVE.IP difikulta emprezáriu timor-oan, kareta estadu utiliza ba atividade pessoal, prosesu pagamentu ba subsídio idosos, auditoria ba Tribunais, no kestaun importante sira seluk ne’ebé precisa atensaun husi Governu no Insituisaun relevenate sira.
Sesaun Plenária ne’e, prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Ministru Obras Públikas, Samuel Marçal, Ministro da Administração Estatal, Tomás do Rosário Cabral, Ministro do Planeamento e Investimento Estratégico, Gastão Francisco de Sousa no Vise-Ministru ba Asuntu Parlamentar, Aderito Hugo da Costa. FIM
