Parlamentu Nasionál liu husi reuniaun plenaria ordinária, iha loron 28 fulan janeiru tinan 2025, autoriza dezlokasaun ba vizita estadu Prezidente Repúblika ba Emiradus Árabes Unidus (EAU), entre loron 11 to’o 13 fulan fevereiro tinan 2025, ho 33 votus a favor, 3 kontra no 14 abstensaun.
Deslokasaun oficial ida ne’e hanesan resposta ba convite husi Sua Alteza real, Sheikh Mohammed Bin Zayed Al Nahyan, Prezidente EAU nian, hodi partisipa iha Simeira Mundial Governu sira nian ba tinan 2025.
Aleinde vizita Estadu, Prezidente Repúblika sei halo mós vizita privadu ba nasaun balunmak hanesan, ba Emiradus Árabes Unidus husi loron 3 to'o loron 5 fulan-Fevereiru tinan 2025, atende konvite husi Sekretáriu-Jeral Alta Komite ba Fraternidade Humana hodi partisipa iha Cimeira ba Premiu Zayed ba Fraternidade Humana, Indonézia- Jakarta iha loron 5 fulan fevereiru tinan 2025, atende ba convite husi Tenente-Jeneral TNI, Kiki Syahnakri, hodi partisipa iha jantar Gala husi Organizasaun WR Film and entertainment no Repúblika Federal Alemaña, atende convite husi Prezidente ba Konferensia segurança Munique nian, Embaixador Cristoph Heusgen, hodi partisipa iha serbisu Konferénsia Seguransa Munique nian 2025, ne'ebé sei hala'o iha loron 14 to'o 16 fulan-Fevereiru.
Iha sesaun plenaria ne’e, Meza mós halo anúnsiu kona-ba relatoriu fiskalizasaun Komisaun Ekonomia no Dezenvolvimentu iha Munisipiu Aileu. Depois de ne’e, kontinua ho Bankada KHUNTO aprezenta deklarasaun politika kona-ba uja-kapiaun iha Timor-Leste. no Deputadu sira mos aprezenta kestaun seluk mak hanesan infraestrutura bázika, Edukasaun, lixu, no kestaun importante sira seluk ne’ebé presija atensaun husi Governu.
Reuniaun plenaria ne’e prezide husi Prezidente Parlamentu Nasionál Interinu, Alexandrino Afonso Nunes, akompaña husi Membru Meza sira no hetan partisipasaun husi, Vise-Ministru ba Asuntu Parlamentar, Aderito Hugo da Costa. FIM
